‎1 ‏וַיֵּ֥לֶךְ שִׁמְשׁ֖וֹן עַזָּ֑תָה וַיַּרְא־שָׁם֙ אִשָּׁ֣ה זוֹנָ֔ה וַיָּבֹ֖א אֵלֶֽיהָ׃

‎2 ‏לַֽעַזָּתִ֣ים׀ לֵאמֹ֗ר בָּ֤א שִׁמְשׁוֹן֙ הֵ֔נָּה וַיָּסֹ֛בּוּ וַיֶּאֶרְבוּ־ל֥וֹ כָל־הַלַּ֖יְלָה בְּשַׁ֣עַר הָעִ֑יר וַיִּתְחָרְשׁ֤וּ כָל־הַלַּ֙יְלָה֙ לֵאמֹ֔ר עַד־א֥וֹר הַבֹּ֖קֶר וַהֲרְגְנֻֽהוּ׃¹

‎3 ‏וַיִּשְׁכַּ֣ב שִׁמְשׁוֹן֮ עַד־חֲצִ֣י הַלַּיְלָה֒ וַיָּ֣קָם׀ בַּחֲצִ֣י הַלַּ֗יְלָה וַיֶּאֱחֹ֞ז בְּדַלְת֤וֹת שַֽׁעַר־הָעִיר֙ וּבִשְׁתֵּ֣י הַמְּזוּז֔וֹת וַיִּסָּעֵם֙ עִֽם־הַבְּרִ֔יחַ וַיָּ֖שֶׂם עַל־כְּתֵפָ֑יו וַֽיַּעֲלֵם֙ אֶל־רֹ֣אשׁ הָהָ֔ר אֲשֶׁ֖ר עַל־פְּנֵ֥י חֶבְרֽוֹן׃ פ

‎4 ‏וַֽיְהִי֙ אַחֲרֵי־כֵ֔ן וַיֶּאֱהַ֥ב אִשָּׁ֖ה בְּנַ֣חַל שֹׂרֵ֑ק וּשְׁמָ֖הּ דְּלִילָֽה׃

‎5 ‏וַיַּעֲל֨וּ אֵלֶ֜יהָ סַרְנֵ֣י פְלִשְׁתִּ֗ים וַיֹּ֨אמְרוּ לָ֜הּ פַּתִּ֣י אוֹת֗וֹ וּרְאִי֙ בַּמֶּה֙ כֹּח֣וֹ גָד֔וֹל וּבַמֶּה֙ נ֣וּכַל ל֔וֹ וַאֲסַרְנֻ֖הוּ לְעַנֹּת֑וֹ וַאֲנַ֙חְנוּ֙ נִתַּן־לָ֔ךְ אִ֕ישׁ אֶ֥לֶף וּמֵאָ֖ה כָּֽסֶף׃

‎6 ‏וַתֹּ֤אמֶר דְּלִילָה֙ אֶל־שִׁמְשׁ֔וֹן הַגִּֽידָה־נָּ֣א לִ֔י בַּמֶּ֖ה כֹּחֲךָ֣ גָד֑וֹל וּבַמֶּ֥ה תֵאָסֵ֖ר לְעַנּוֹתֶֽךָ׃

‎7 ‏וַיֹּ֤אמֶר אֵלֶ֙יהָ֙ שִׁמְשׁ֔וֹן אִם־יַאַסְרֻ֗נִי בְּשִׁבְעָ֛ה יְתָרִ֥ים לַחִ֖ים אֲשֶׁ֣ר לֹא־חֹרָ֖בוּ וְחָלִ֥יתִי וְהָיִ֖יתִי כְּאַחַ֥ד הָאָדָֽם׃

‎8 ‏וַיַּעֲלוּ־לָ֞הּ סַרְנֵ֣י פְלִשְׁתִּ֗ים שִׁבְעָ֛ה יְתָרִ֥ים לַחִ֖ים אֲשֶׁ֣ר לֹא־חֹרָ֑בוּ וַתַּאַסְרֵ֖הוּ בָּהֶֽם׃

‎9 ‏וְהָאֹרֵ֗ב יֹשֵׁ֥ב לָהּ֙ בַּחֶ֔דֶר וַתֹּ֣אמֶר אֵלָ֔יו פְּלִשְׁתִּ֥ים עָלֶ֖יךָ שִׁמְשׁ֑וֹן וַיְנַתֵּק֙ אֶת־הַיְתָרִ֔ים כַּאֲשֶׁ֨ר יִנָּתֵ֤ק פְּתִֽיל־הַנְּעֹ֙רֶת֙ בַּהֲרִיח֣וֹ אֵ֔שׁ וְלֹ֥א נוֹדַ֖ע כֹּחֽוֹ׃

‎10 ‏וַתֹּ֤אמֶר דְּלִילָה֙ אֶל־שִׁמְשׁ֔וֹן הִנֵּה֙ הֵתַ֣לְתָּ בִּ֔י וַתְּדַבֵּ֥ר אֵלַ֖י כְּזָבִ֑ים עַתָּה֙ הַגִּֽידָה־נָּ֣א לִ֔י בַּמֶּ֖ה תֵּאָסֵֽר׃

‎11 ‏וַיֹּ֣אמֶר אֵלֶ֔יהָ אִם־אָס֤וֹר יַאַסְר֙וּנִי֙ בַּעֲבֹתִ֣ים חֲדָשִׁ֔ים אֲשֶׁ֛ר לֹֽא־נַעֲשָׂ֥ה בָהֶ֖ם מְלָאכָ֑ה וְחָלִ֥יתִי וְהָיִ֖יתִי כְּאַחַ֥ד הָאָדָֽם׃

‎12 ‏וַתִּקַּ֣ח דְּלִילָה֩ עֲבֹתִ֨ים חֲדָשִׁ֜ים וַתַּאַסְרֵ֣הוּ בָהֶ֗ם וַתֹּ֤אמֶר אֵלָיו֙ פְּלִשְׁתִּ֤ים עָלֶ֙יךָ֙ שִׁמְשׁ֔וֹן וְהָאֹרֵ֖ב יֹשֵׁ֣ב בֶּחָ֑דֶר וַֽיְנַתְּקֵ֛ם מֵעַ֥ל זְרֹעֹתָ֖יו כַּחֽוּט׃

‎13 ‏וַתֹּ֨אמֶר דְּלִילָ֜ה אֶל־שִׁמְשׁ֗וֹן עַד־הֵ֜נָּה הֵתַ֤לְתָּ בִּי֙ וַתְּדַבֵּ֤ר אֵלַי֙ כְּזָבִ֔ים הַגִּ֣ידָה לִּ֔י בַּמֶּ֖ה תֵּאָסֵ֑ר וַיֹּ֣אמֶר אֵלֶ֔יהָ אִם־תַּאַרְגִ֗י אֶת־שֶׁ֛בַע מַחְלְפ֥וֹת רֹאשִׁ֖י עִם־הַמַּסָּֽכֶת׃

‎14 ‏וַתִּתְקַע֙ בַּיָּתֵ֔ד וַתֹּ֣אמֶר אֵלָ֔יו פְּלִשְׁתִּ֥ים עָלֶ֖יךָ שִׁמְשׁ֑וֹן וַיִּיקַץ֙ מִשְּׁנָת֔וֹ וַיִּסַּ֛ע אֶת־הַיְתַ֥ד הָאֶ֖רֶג וְאֶת־הַמַּסָּֽכֶת׃

‎15 ‏וַתֹּ֣אמֶר אֵלָ֗יו אֵ֚יךְ תֹּאמַ֣ר אֲהַבְתִּ֔יךְ וְלִבְּךָ֖ אֵ֣ין אִתִּ֑י זֶ֣ה שָׁלֹ֤שׁ פְּעָמִים֙ הֵתַ֣לְתָּ בִּ֔י וְלֹא־הִגַּ֣דְתָּ לִּ֔י בַּמֶּ֖ה כֹּחֲךָ֥ גָדֽוֹל׃

‎16 ‏וַ֠יְהִי כִּֽי־הֵצִ֨יקָה לּ֧וֹ בִדְבָרֶ֛יהָ כָּל־הַיָּמִ֖ים וַתְּאַֽלֲצֵ֑הוּ וַתִּקְצַ֥ר נַפְשׁ֖וֹ לָמֽוּת׃

‎17 ‏וַיַּגֶּד־לָ֣הּ אֶת־כָּל־לִבּ֗וֹ וַיֹּ֤אמֶר לָהּ֙ מוֹרָה֙ לֹֽא־עָלָ֣ה עַל־רֹאשִׁ֔י כִּֽי־נְזִ֧יר אֱלֹהִ֛ים אֲנִ֖י מִבֶּ֣טֶן אִמִּ֑י אִם־גֻּלַּ֙חְתִּי֙ וְסָ֣ר מִמֶּ֣נִּי כֹחִ֔י וְחָלִ֥יתִי וְהָיִ֖יתִי כְּכָל־הָאָדָֽם׃

‎18 ‏וַתֵּ֣רֶא דְּלִילָ֗ה כִּֽי־הִגִּ֣יד לָהּ֮ אֶת־כָּל־לִבּוֹ֒ וַתִּשְׁלַ֡ח וַתִּקְרָא֩ לְסַרְנֵ֨י פְלִשְׁתִּ֤ים לֵאמֹר֙ עֲל֣וּ הַפַּ֔עַם כִּֽי־הִגִּ֥יד לה לִ֖י אֶת־כָּל־לִבּ֑וֹ וְעָל֤וּ אֵלֶ֙יהָ֙ סַרְנֵ֣י פְלִשְׁתִּ֔ים וַיַּעֲל֥וּ הַכֶּ֖סֶף בְּיָדָֽם׃

‎19 ‏וַתְּיַשְּׁנֵ֙הוּ֙ עַל־בִּרְכֶּ֔יהָ וַתִּקְרָ֣א לָאִ֔ישׁ וַתְּגַלַּ֕ח אֶת־שֶׁ֖בַע מַחְלְפ֣וֹת רֹאשׁ֑וֹ וַתָּ֙חֶל֙ לְעַנּוֹת֔וֹ וַיָּ֥סַר כֹּח֖וֹ מֵעָלָֽיו׃

‎20 ‏וַתֹּ֕אמֶר פְּלִשְׁתִּ֥ים עָלֶ֖יךָ שִׁמְשׁ֑וֹן וַיִּקַ֣ץ מִשְּׁנָת֗וֹ וַיֹּ֙אמֶר֙ אֵצֵ֞א כְּפַ֤עַם בְּפַ֙עַם֙ וְאִנָּעֵ֔ר וְהוּא֙ לֹ֣א יָדַ֔ע כִּ֥י יְהוָ֖ה סָ֥ר מֵעָלָֽיו׃

‎21 ‏וַיֹּאחֲז֣וּהוּ פְלִשְׁתִּ֔ים וַֽיְנַקְּר֖וּ אֶת־עֵינָ֑יו וַיּוֹרִ֨ידוּ אוֹת֜וֹ עַזָּ֗תָה וַיַּאַסְר֙וּהוּ֙ בַּֽנְחֻשְׁתַּ֔יִם וַיְהִ֥י טוֹחֵ֖ן בְּבֵ֥ית האסירים הָאֲסוּרִֽים׃

‎22 ‏וַיָּ֧חֶל שְׂעַר־רֹאשׁ֛וֹ לְצַמֵּ֖חַ כַּאֲשֶׁ֥ר גֻּלָּֽח׃ פ

‎23 ‏וְסַרְנֵ֣י פְלִשְׁתִּ֗ים נֶֽאֱסְפוּ֙¹ לִזְבֹּ֧חַ זֶֽבַח־גָּד֛וֹל לְדָג֥וֹן אֱלֹהֵיהֶ֖ם וּלְשִׂמְחָ֑ה וַיֹּ֣אמְר֔וּ נָתַ֤ן אֱלֹהֵ֙ינוּ֙ בְּיָדֵ֔נוּ אֵ֖ת שִׁמְשׁ֥וֹן אוֹיְבֵֽינוּ׃

‎24 ‏וַיִּרְא֤וּ אֹתוֹ֙ הָעָ֔ם וַֽיְהַלְל֖וּ אֶת־אֱלֹהֵיהֶ֑ם כִּ֣י אָמְר֗וּ נָתַ֨ן אֱלֹהֵ֤ינוּ בְיָדֵ֙נוּ֙ אֶת־א֣וֹיְבֵ֔נוּ וְאֵת֙ מַחֲרִ֣יב אַרְצֵ֔נוּ וַאֲשֶׁ֥ר הִרְבָּ֖ה אֶת־חֲלָלֵֽינוּ׃

‎25 ‏וַֽיְהִי֙ כי טוב כְּט֣וֹב לִבָּ֔ם וַיֹּ֣אמְר֔וּ קִרְא֥וּ לְשִׁמְשׁ֖וֹן וִישַֽׂחֶק־לָ֑נוּ וַיִּקְרְא֨וּ לְשִׁמְשׁ֜וֹן מִבֵּ֣ית האסירים הָאֲסוּרִ֗ים וַיְצַחֵק֙ לִפְנֵיהֶ֔ם וַיַּעֲמִ֥ידוּ אוֹת֖וֹ בֵּ֥ין הָעַמּוּדִֽים׃

‎26 ‏וַיֹּ֨אמֶר שִׁמְשׁ֜וֹן אֶל־הַנַּ֨עַר הַמַּחֲזִ֣יק בְּיָדוֹ֮ הַנִּ֣יחָה אוֹתִי֒ והימשני וַהֲמִשֵׁ֙נִי֙ אֶת־הָֽעַמֻּדִ֔ים אֲשֶׁ֥ר הַבַּ֖יִת נָכ֣וֹן עֲלֵיהֶ֑ם וְאֶשָּׁעֵ֖ן עֲלֵיהֶֽם׃

‎27 ‏וְהַבַּ֗יִת מָלֵ֤א הָֽאֲנָשִׁים֙ וְהַנָּשִׁ֔ים וְשָׁ֕מָּה כֹּ֖ל סַרְנֵ֣י פְלִשְׁתִּ֑ים וְעַל־הַגָּ֗ג כִּשְׁלֹ֤שֶׁת אֲלָפִים֙ אִ֣ישׁ וְאִשָּׁ֔ה הָרֹאִ֖ים בִּשְׂח֥וֹק שִׁמְשֽׁוֹן׃

‎28 ‏וַיִּקְרָ֥א שִׁמְשׁ֛וֹן אֶל־יְהוָ֖ה וַיֹּאמַ֑ר אֲדֹנָ֣י יֱהוִֹ֡ה זָכְרֵ֣נִי נָא֩ וְחַזְּקֵ֨נִי נָ֜א אַ֣ךְ הַפַּ֤עַם הַזֶּה֙ הָאֱלֹהִ֔ים וְאִנָּקְמָ֧ה נְקַם־אַחַ֛ת מִשְּׁתֵ֥י עֵינַ֖י מִפְּלִשְׁתִּֽים׃

‎29 ‏וַיִּלְפֹּ֨ת שִׁמְשׁ֜וֹן אֶת־שְׁנֵ֣י׀ עַמּוּדֵ֣י הַתָּ֗וֶךְ אֲשֶׁ֤ר הַבַּ֙יִת֙ נָכ֣וֹן עֲלֵיהֶ֔ם וַיִּסָּמֵ֖ךְ עֲלֵיהֶ֑ם אֶחָ֥ד בִּימִינ֖וֹ וְאֶחָ֥ד בִּשְׂמֹאלֽוֹ׃

‎30 ‏וַיֹּ֣אמֶר שִׁמְשׁ֗וֹן תָּמ֣וֹת נַפְשִׁי֮ עִם־פְּלִשְׁתִּים֒ וַיֵּ֣ט בְּכֹ֔חַ וַיִּפֹּ֤ל הַבַּ֙יִת֙ עַל־הַסְּרָנִ֔ים וְעַל־כָּל־הָעָ֖ם אֲשֶׁר־בּ֑וֹ וַיִּהְי֤וּ הַמֵּתִים֙ אֲשֶׁ֣ר הֵמִ֣ית בְּמוֹת֔וֹ רַבִּ֕ים מֵאֲשֶׁ֥ר הֵמִ֖ית בְּחַיָּֽיו׃

‎31 ‏וַיֵּרְד֨וּ אֶחָ֜יו וְכָל־בֵּ֣ית אָבִיהוּ֮ וַיִּשְׂא֣וּ אֹתוֹ֒ וַֽיַּעֲל֣וּ׀ וַיִּקְבְּר֣וּ אוֹת֗וֹ בֵּ֤ין צָרְעָה֙ וּבֵ֣ין אֶשְׁתָּאֹ֔ל בְּקֶ֖בֶר מָנ֣וֹחַ אָבִ֑יו וְה֛וּא שָׁפַ֥ט אֶת־יִשְׂרָאֵ֖ל עֶשְׂרִ֥ים שָׁנָֽה׃ פ

1 wayyēleḵə šiməšwōn ‘azzāṯâ wayyarə’-šām ’iššâ zwōnâ wayyāḇō’ ’ēleyhā:

2 l^a‘azzāṯîm| lē’mōr bā’ šiməšwōn hēnnâ wayyāsōbû wayye’erəḇû-lwō ḵāl-hallayəlâ bəš^a‘ar hā‘îr wayyiṯəḥārəšû ḵāl-hallayəlâ lē’mōr ‘aḏ-’wōr habōqer wahărəḡənuhû:¹

3 wayyišəkaḇ šiməšwōn ‘aḏ-ḥăṣî hallayəlâ wayyāqām| b^aḥăṣî hallayəlâ wayye’ĕḥōz bəḏaləṯwōṯ š^a‘ar-hā‘îr ûḇišətê hamməzûzwōṯ wayyissā‘ēm ‘im-habərîḥa wayyāśem ‘al-kəṯēfāyw wayy^a‘ălēm ’el-rō’š hâār ’ăšer ‘al-pənê ḥeḇərwōn: f

4 wayəhî ’^aḥărê-ḵēn wayye’ĕhaḇ ’iššâ bən^aḥal śōrēq ûšəmāh dəlîlâ:

5 wayy^a‘ălû ’ēleyhā sarənê fəlišətîm wayyō’mərû lāh patî ’wōṯwō ûrə’î bammeh kōḥwō ḡāḏwōl ûḇammeh nûḵal lwō wa’ăsarənuhû lə‘annōṯwō wa’ăn^aḥənû nitan-lāḵə ’îš ’elef ûmē’â kāsef:

6 watō’mer dəlîlâ ’el-šiməšwōn hagîḏâ-nnā’ lî bammeh kōḥăḵā ḡāḏwōl ûḇammeh ṯē’āsēr lə‘annwōṯeḵā:

7 wayyō’mer ’ēleyhā šiməšwōn ’im-ya’asərunî bəšiḇə‘â yəṯārîm l^aḥîm ’ăšer lō’-ḥōrāḇû wəḥālîṯî wəhāyîṯî kə’^aḥaḏ hā’āḏām:

8 wayy^a‘ălû-lāh sarənê fəlišətîm šiḇə‘â yəṯārîm l^aḥîm ’ăšer lō’-ḥōrāḇû wata’asərēhû bâem:

9 wəhā’ōrēḇ yōšēḇ lāh b^aḥeḏer watō’mer ’ēlāyw pəlišətîm ‘āleyḵā šiməšwōn wayənatēq ’eṯ-hayəṯārîm ka’ăšer yinnāṯēq pəṯîl-hannə‘ōreṯ bahărîḥwō ’ēš wəlō’ nwōḏ^a‘ kōḥwō:

10 watō’mer dəlîlâ ’el-šiməšwōn hinnēh hēṯalətā bî watəḏabēr ’ēlay kəzāḇîm ‘atâ hagîḏâ-nnā’ lî bammeh tē’āsēr:

11 wayyō’mer ’ēleyhā ’im-’āswōr ya’asərûnî b^a‘ăḇōṯîm ḥăḏāšîm ’ăšer lō’-n^a‘ăśâ ḇâem məlā’ḵâ wəḥālîṯî wəhāyîṯî kə’^aḥaḏ hā’āḏām:

12 watiqq^aḥ dəlîlâ ‘ăḇōṯîm ḥăḏāšîm wata’asərēhû ḇâem watō’mer ’ēlāyw pəlišətîm ‘āleyḵā šiməšwōn wəhā’ōrēḇ yōšēḇ beḥāḏer wayənatəqēm mē‘al zərō‘ōṯāyw k^aḥûṭ:

13 watō’mer dəlîlâ ’el-šiməšwōn ‘aḏ-hēnnâ hēṯalətā bî watəḏabēr ’ēlay kəzāḇîm hagîḏâ llî bammeh tē’āsēr wayyō’mer ’ēleyhā ’im-ta’arəḡî ’eṯ-šeḇ^a‘ m^aḥələfwōṯ rō’šî ‘im-hammassāḵeṯ:

14 watiṯəq^a‘ bayyāṯēḏ watō’mer ’ēlāyw pəlišətîm ‘āleyḵā šiməšwōn wayyîqaṣ miššənāṯwō wayyiss^a‘ ’eṯ-hayəṯaḏ hā’ereḡ wə’eṯ-hammassāḵeṯ:

15 watō’mer ’ēlāyw ’êḵə tō’mar ’ăhaḇətîḵə wəlibəḵā ’ên ’itî zeh šālōš pə‘āmîm hēṯalətā bî wəlō’-higaḏətā llî bammeh kōḥăḵā ḡāḏwōl:

16 wayəhî kî-hēṣîqâ llwō ḇiḏəḇāreyhā kāl-hayyāmîm watə’alăṣēhû watiqəṣar nafəšwō lāmûṯ:

17 wayyageḏ-lāh ’eṯ-kāl-libwō wayyō’mer lāh mwōrâ lō’-‘ālâ ‘al-rō’šî kî-nəzîr ’ĕlōhîm ’ănî mibeṭen ’immî ’im-gull^aḥətî wəsār mimmennî ḵōḥî wəḥālîṯî wəhāyîṯî kəḵāl-hā’āḏām:

18 watēre’ dəlîlâ kî-higîḏ lāh ’eṯ-kāl-libwō watišəl^aḥ watiqərā’ ləsarənê fəlišətîm lē’mōr ‘ălû hap^a‘am kî-higîḏ lāh lî ’eṯ-kāl-libwō wə‘ālû ’ēleyhā sarənê fəlišətîm wayy^a‘ălû hakesef bəyāḏām:

19 watəyaššənēhû ‘al-birəkeyhā watiqərā’ lā’îš watəḡall^aḥ ’eṯ-šeḇ^a‘ m^aḥələfwōṯ rō’šwō watāḥel lə‘annwōṯwō wayyāsar kōḥwō mē‘ālāyw:

20 watō’mer pəlišətîm ‘āleyḵā šiməšwōn wayyiqaṣ miššənāṯwō wayyō’mer ’ēṣē’ kəf^a‘am bəf^a‘am wə’innā‘ēr wəhû’ lō’ yāḏ^a‘ kî yəhwâ sār mē‘ālāyw:

21 wayyō’ḥăzûhû fəlišətîm wayənaqqərû ’eṯ-‘ênāyw wayywōrîḏû ’wōṯwō ‘azzāṯâ wayya’asərûhû banəḥušətayim wayəhî ṭwōḥēn bəḇêṯ hā’ăsîrîm hā’ăsûrîm:

22 wayyāḥel śə‘ar-rō’šwō ləṣammēḥa ka’ăšer gullāḥ: f

23 wəsarənê fəlišətîm ne’ĕsəfû¹ lizəbōḥa zeḇ^aḥ-gāḏwōl ləḏāḡwōn ’ĕlōhêhem ûləśiməḥâ wayyō’mərû nāṯan ’ĕlōhênû bəyāḏēnû ’ēṯ šiməšwōn ’wōyəḇênû:

24 wayyirə’û ’ōṯwō hā‘ām wayəhaləlû ’eṯ-’ĕlōhêhem kî ’āmərû nāṯan ’ĕlōhênû ḇəyāḏēnû ’eṯ-’wōyəḇēnû wə’ēṯ m^aḥărîḇ ’arəṣēnû wa’ăšer hirəbâ ’eṯ-ḥălālênû:

25 wayəhî kî ṭwōḇ kəṭwōḇ libām wayyō’mərû qirə’û ləšiməšwōn wîś^aḥeq-lānû wayyiqərə’û ləšiməšwōn mibêṯ hā’ăsîrîm hā’ăsûrîm wayəṣ^aḥēq lifənêhem wayy^a‘ămîḏû ’wōṯwō bên hā‘ammûḏîm:

26 wayyō’mer šiməšwōn ’el-hann^a‘ar hamm^aḥăzîq bəyāḏwō hannîḥâ ’wōṯî wəhêmišēnî wahămišēnî ’eṯ-hā‘ammuḏîm ’ăšer habayiṯ nāḵwōn ‘ălêhem wə’eššā‘ēn ‘ălêhem:

27 wəhabayiṯ mālē’ hā’ănāšîm wəhannāšîm wəšāmmâ kōl sarənê fəlišətîm wə‘al-hagāḡ kišəlōšeṯ ’ălāfîm ’îš wə’iššâ hārō’îm biśəḥwōq šiməšwōn:

28 wayyiqərā’ šiməšwōn ’el-yəhwâ wayyō’mar ’ăḏōnāy yĕhwōih zāḵərēnî nā’ wəḥazzəqēnî nā’ ’aḵə hap^a‘am hazzeh hā’ĕlōhîm wə’innāqəmâ nəqam-’^aḥaṯ miššəṯê ‘ênay mipəlišətîm:

29 wayyiləpōṯ šiməšwōn ’eṯ-šənê| ‘ammûḏê hatāweḵə ’ăšer habayiṯ nāḵwōn ‘ălêhem wayyissāmēḵə ‘ălêhem ’eḥāḏ bîmînwō wə’eḥāḏ biśəmō’lwō:

30 wayyō’mer šiməšwōn tāmwōṯ nafəšî ‘im-pəlišətîm wayyēṭ bəḵōḥa wayyipōl habayiṯ ‘al-hassərānîm wə‘al-kāl-hā‘ām ’ăšer-bwō wayyihəyû hammēṯîm ’ăšer hēmîṯ bəmwōṯwō rabîm mē’ăšer hēmîṯ bəḥayyāyw:

31 wayyērəḏû ’eḥāyw wəḵāl-bêṯ ’āḇîhû wayyiśə’û ’ōṯwō wayy^a‘ălû| wayyiqəbərû ’wōṯwō bên ṣārə‘â ûḇên ’ešətā’ōl bəqeḇer mānwōḥa ’āḇîw wəhû’ šāfaṭ ’eṯ-yiśərā’ēl ‘eśərîm šānâ: f