‎1 ‏וַיְהִי֩ בִשְׁנַ֨ת הַתְּשִׁיעִ֜ית לְמָלְכ֗וֹ בַּחֹ֣דֶשׁ הָעֲשִׂירִי֮ בֶּעָשׂ֣וֹר לַחֹדֶשׁ֒ בָּ֠א נְבֻכַדְנֶאצַּ֨ר מֶֽלֶךְ־בָּבֶ֜ל ה֧וּא וְכָל־חֵיל֛וֹ עַל־יְרוּשָׁלִַ֖ם וַיִּ֣חַן עָלֶ֑יהָ וַיִּבְנ֥וּ עָלֶ֖יהָ דָּיֵ֥ק סָבִֽיב׃

‎2 ‏וַתָּבֹ֥א הָעִ֖יר בַּמָּצ֑וֹר עַ֚ד עַשְׁתֵּ֣י עֶשְׂרֵ֣ה שָׁנָ֔ה לַמֶּ֖לֶךְ צִדְקִיָּֽהוּ׃

‎3 ‏בְּתִשְׁעָ֣ה לַחֹ֔דֶשׁ וַיֶּחֱזַ֥ק הָרָעָ֖ב בָּעִ֑יר וְלֹא־הָ֥יָה לֶ֖חֶם לְעַ֥ם הָאָֽרֶץ׃

‎4 ‏וַתִּבָּקַ֣ע הָעִ֗יר וְכָל־אַנְשֵׁ֨י הַמִּלְחָמָ֤ה׀ הַלַּ֙יְלָה֙ דֶּ֜רֶךְ שַׁ֣עַר׀ בֵּ֣ין הַחֹמֹתַ֗יִם אֲשֶׁר֙ עַל־גַּ֣ן הַמֶּ֔לֶךְ וְכַשְׂדִּ֥ים עַל־הָעִ֖יר סָבִ֑יב וַיֵּ֖לֶךְ דֶּ֥רֶךְ הָעֲרָבָֽה׃

‎5 ‏וַיִּרְדְּפ֤וּ חֵיל־כַּשְׂדִּים֙ אַחַ֣ר הַמֶּ֔לֶךְ וַיַּשִּׂ֥גוּ אֹת֖וֹ בְּעַרְב֣וֹת יְרֵח֑וֹ וְכָל־חֵיל֔וֹ נָפֹ֖צוּ מֵעָלָֽיו׃

‎6 ‏וַֽיִּתְפְּשׂוּ֙ אֶת־הַמֶּ֔לֶךְ וַיַּעֲל֥וּ אֹת֛וֹ אֶל־מֶ֥לֶךְ בָּבֶ֖ל רִבְלָ֑תָה וַיְדַבְּר֥וּ אִתּ֖וֹ מִשְׁפָּֽט׃

‎7 ‏וְאֶת־בְּנֵי֙ צִדְקִיָּ֔הוּ שָׁחֲט֖וּ לְעֵינָ֑יו וְאֶת־עֵינֵ֤י צִדְקִיָּ֙הוּ֙ עִוֵּ֔ר וַיַּאַסְרֵ֙הוּ֙ בַֽנְחֻשְׁתַּ֔יִם וַיְבִאֵ֖הוּ בָּבֶֽל׃ ס

‎8 ‏וּבַחֹ֤דֶשׁ הַֽחֲמִישִׁי֙ בְּשִׁבְעָ֣ה לַחֹ֔דֶשׁ הִ֗יא שְׁנַת֙ תְּשַֽׁע־עֶשְׂרֵ֣ה שָׁנָ֔ה לַמֶּ֖לֶךְ נְבֻכַדְנֶאצַּ֣ר מֶֽלֶךְ־בָּבֶ֑ל בָּ֞א נְבוּזַרְאֲדָ֧ן רַב־טַבָּחִ֛ים עֶ֥בֶד מֶֽלֶךְ־בָּבֶ֖ל יְרוּשָׁלִָֽם׃

‎9 ‏וַיִּשְׂרֹ֥ף אֶת־בֵּית־יְהוָ֖ה וְאֶת־בֵּ֣ית הַמֶּ֑לֶךְ וְאֵ֨ת כָּל־בָּתֵּ֧י יְרוּשָׁלִַ֛ם וְאֶת־כָּל־בֵּ֥ית גָּד֖וֹל שָׂרַ֥ף בָּאֵֽשׁ׃

‎10 ‏וְאֶת־חוֹמֹ֥ת יְרוּשָׁלִַ֖ם סָבִ֑יב נָֽתְצוּ֙ כָּל־חֵ֣יל כַּשְׂדִּ֔ים אֲשֶׁ֖ר רַב־טַבָּחִֽים׃

‎11 ‏וְאֵת֩ יֶ֨תֶר הָעָ֜ם הַנִּשְׁאָרִ֣ים בָּעִ֗יר וְאֶת־הַנֹּֽפְלִים֙ אֲשֶׁ֤ר נָפְלוּ֙ עַל־הַמֶּ֣לֶךְ בָּבֶ֔ל וְאֵ֖ת יֶ֣תֶר הֶהָמ֑וֹן הֶגְלָ֕ה נְבוּזַרְאֲדָ֖ן רַב־טַבָּחִֽים׃

‎12 ‏וּמִדַּלַּ֣ת הָאָ֔רֶץ הִשְׁאִ֖יר רַב־טַבָּחִ֑ים לְכֹֽרְמִ֖ים וּלְיֹגְבִֽים׃

‎13 ‏וְאֶת־עַמּוּדֵ֨י הַנְּחֹ֜שֶׁת אֲשֶׁ֣ר בֵּית־יְהוָ֗ה וְֽאֶת־הַמְּכֹנ֞וֹת וְאֶת־יָ֧ם הַנְּחֹ֛שֶׁת אֲשֶׁ֥ר בְּבֵית־יְהוָ֖ה שִׁבְּר֣וּ כַשְׂדִּ֑ים וַיִּשְׂא֥וּ אֶת־נְחֻשְׁתָּ֖ם בָּבֶֽלָה׃

‎14 ‏וְאֶת־הַסִּירֹ֨ת וְאֶת־הַיָּעִ֜ים וְאֶת־הַֽמְזַמְּר֣וֹת וְאֶת־הַכַּפּ֗וֹת וְאֵ֨ת כָּל־כְּלֵ֧י הַנְּחֹ֛שֶׁת אֲשֶׁ֥ר יְשָֽׁרְתוּ־בָ֖ם לָקָֽחוּ׃

‎15 ‏וְאֶת־הַמַּחְתּוֹת֙ וְאֶת־הַמִּזְרָק֗וֹת אֲשֶׁ֤ר זָהָב֙ זָהָ֔ב וַאֲשֶׁר־כֶּ֖סֶף כָּ֑סֶף לָקַ֖ח רַב־טַבָּחִֽים׃

‎16 ‏הָעַמּוּדִ֣ים׀ שְׁנַ֗יִם הַיָּ֤ם הָֽאֶחָד֙ וְהַמְּכֹנ֔וֹת אֲשֶׁר־עָשָׂ֥ה שְׁלֹמֹ֖ה לְבֵ֣ית יְהוָ֑ה לֹא־הָיָ֣ה מִשְׁקָ֔ל לִנְחֹ֖שֶׁת כָּל־הַכֵּלִ֥ים הָאֵֽלֶּה׃

‎17 ‏שְׁמֹנֶה֩ עֶשְׂרֵ֨ה אַמָּ֜ה קוֹמַ֣ת׀ הָעַמּ֣וּד הָאֶחָ֗ד וְכֹתֶ֨רֶת עָלָ֥יו׀ נְחֹשֶׁת֮ וְקוֹמַ֣ת הַכֹּתֶרֶת֮ שָׁלֹ֣שׁ אמה אַמּוֹת֒ וּשְׂבָכָ֨ה וְרִמֹּנִ֧ים עַֽל־הַכֹּתֶ֛רֶת סָבִ֖יב הַכֹּ֣ל נְחֹ֑שֶׁת וְכָאֵ֛לֶּה לַֽעַמּ֥וּד הַשֵּׁנִ֖י עַל־הַשְּׂבָכָֽה׃

‎18 ‏וַיִּקַּ֣ח רַב־טַבָּחִ֗ים אֶת־שְׂרָיָה֙ כֹּהֵ֣ן הָרֹ֔אשׁ וְאֶת־צְפַנְיָ֖הוּ כֹּהֵ֣ן מִשְׁנֶ֑ה וְאֶת־שְׁלֹ֖שֶׁת שֹׁמְרֵ֥י הַסַּֽף׃

‎19 ‏וּמִן־הָעִ֡יר לָקַח֩ סָרִ֨יס אֶחָ֜ד אֲ‍ֽשֶׁר־ה֥וּא פָקִ֣יד׀ עַל־אַנְשֵׁ֣י הַמִּלְחָמָ֗ה וַחֲמִשָּׁ֨ה אֲנָשִׁ֜ים מֵרֹאֵ֤י פְנֵֽי־הַמֶּ֙לֶךְ֙ אֲשֶׁ֣ר נִמְצְא֣וּ בָעִ֔יר וְאֵ֗ת הַסֹּפֵר֙ שַׂ֣ר הַצָּבָ֔א הַמַּצְבִּ֖א אֶת־עַ֣ם הָאָ֑רֶץ וְשִׁשִּׁ֥ים אִישׁ֙ מֵעַ֣ם הָאָ֔רֶץ הַֽנִּמְצְאִ֖ים בָּעִֽיר׃

‎20 ‏וַיִּקַּ֣ח אֹתָ֔ם נְבוּזַרְאֲדָ֖ן רַב־טַבָּחִ֑ים וַיֹּ֧לֶךְ אֹתָ֛ם עַל־מֶ֥לֶךְ בָּבֶ֖ל רִבְלָֽתָה׃

‎21 ‏וַיַּ֣ךְ אֹתָם֩ מֶ֨לֶךְ בָּבֶ֧ל וַיְמִיתֵ֛ם בְּרִבְלָ֖ה בְּאֶ֣רֶץ חֲמָ֑ת וַיִּ֥גֶל יְהוּדָ֖ה מֵעַ֥ל אַדְמָתֽוֹ׃

‎22 ‏וְהָעָ֗ם הַנִּשְׁאָר֙ בְּאֶ֣רֶץ יְהוּדָ֔ה אֲשֶׁ֣ר הִשְׁאִ֔יר נְבֽוּכַדְנֶאצַּ֖ר מֶ֣לֶךְ בָּבֶ֑ל וַיַּפְקֵ֣ד עֲלֵיהֶ֔ם אֶת־גְּדַלְיָ֖הוּ בֶּן־אֲחִיקָ֥ם בֶּן־שָׁפָֽן׃ פ

‎23 ‏וַיִּשְׁמְעוּ֩ כָל־שָׂרֵ֨י הַחֲיָלִ֜ים הֵ֣מָּה וְהָאֲנָשִׁ֗ים כִּֽי־הִפְקִ֤יד מֶֽלֶךְ־בָּבֶל֙ אֶת־גְּדַלְיָ֔הוּ וַיָּבֹ֥אוּ אֶל־גְּדַלְיָ֖הוּ הַמִּצְפָּ֑ה וְיִשְׁמָעֵ֣אל בֶּן־נְתַנְיָ֡ה וְיוֹחָנָ֣ן בֶּן־קָ֠רֵחַ וּשְׂרָיָ֨ה בֶן־תַּנְחֻ֜מֶת הַנְּטֹפָתִ֗י וְיַֽאֲזַנְיָ֙הוּ֙ בֶּן־הַמַּ֣עֲכָתִ֔י הֵ֖מָּה וְאַנְשֵׁיהֶֽם׃

‎24 ‏וַיִּשָּׁבַ֨ע לָהֶ֤ם גְּדַלְיָ֙הוּ֙ וּלְאַנְשֵׁיהֶ֔ם וַיֹּ֣אמֶר לָהֶ֔ם אַל־תִּֽירְא֖וּ מֵעַבְדֵ֣י הַכַּשְׂדִּ֑ים שְׁב֣וּ בָאָ֗רֶץ וְעִבְד֛וּ אֶת־מֶ֥לֶךְ בָּבֶ֖ל וְיִטַ֥ב לָכֶֽם׃ ס

‎25 ‏וַיְהִ֣י׀ בַּחֹ֣דֶשׁ הַשְּׁבִיעִ֗י בָּ֣א יִשְׁמָעֵ֣אל בֶּן־נְ֠תַנְיָה בֶּן־אֱלִ֨ישָׁמָ֜ע מִזֶּ֣רַע הַמְּלוּכָ֗ה וַעֲשָׂרָ֤ה אֲנָשִׁים֙ אִתּ֔וֹ וַיַּכּ֥וּ אֶת־גְּדַלְיָ֖הוּ וַיָּמֹ֑ת וְאֶת־הַיְּהוּדִים֙ וְאֶת־הַכַּשְׂדִּ֔ים אֲשֶׁר־הָי֥וּ אִתּ֖וֹ בַּמִּצְפָּֽה׃

‎26 ‏וַיָּקֻ֨מוּ כָל־הָעָ֜ם מִקָּטֹ֤ן וְעַד־גָּדוֹל֙ וְשָׂרֵ֣י הַחֲיָלִ֔ים וַיָּבֹ֖אוּ מִצְרָ֑יִם כִּ֥י יָרְא֖וּ מִפְּנֵ֥י כַשְׂדִּֽים׃ פ

‎27 ‏וַיְהִי֩ בִשְׁלֹשִׁ֨ים וָשֶׁ֜בַע שָׁנָ֗ה לְגָלוּת֙ יְהוֹיָכִ֣ין מֶֽלֶךְ־יְהוּדָ֔ה בִּשְׁנֵ֤ים עָשָׂר֙ חֹ֔דֶשׁ בְּעֶשְׂרִ֥ים וְשִׁבְעָ֖ה לַחֹ֑דֶשׁ נָשָׂ֡א אֱוִ֣יל מְרֹדַךְ֩ מֶ֨לֶךְ בָּבֶ֜ל בִּשְׁנַ֣ת מָלְכ֗וֹ אֶת־רֹ֛אשׁ יְהוֹיָכִ֥ין מֶֽלֶךְ־יְהוּדָ֖ה מִבֵּ֥ית כֶּֽלֶא׃

‎28 ‏וַיְדַבֵּ֥ר אִתּ֖וֹ טֹב֑וֹת וַיִּתֵּן֙ אֶת־כִּסְא֔וֹ מֵעַ֗ל כִּסֵּ֧א הַמְּלָכִ֛ים אֲשֶׁ֥ר אִתּ֖וֹ בְּבָבֶֽל׃

‎29 ‏וְשִׁנָּ֕א אֵ֖ת בִּגְדֵ֣י כִלְא֑וֹ וְאָכַ֨ל לֶ֧חֶם תָּמִ֛יד לְפָנָ֖יו כָּל־יְמֵ֥י חַיָּֽיו׃

‎30 ‏וַאֲרֻחָת֗וֹ אֲרֻחַ֨ת תָּמִ֧יד נִתְּנָה־לּ֛וֹ מֵאֵ֥ת הַמֶּ֖לֶךְ דְּבַר־י֣וֹם בְּיוֹמ֑וֹ כֹּ֖ל יְמֵ֥י חַיָּֽו׃

1 wayəhî ḇišənaṯ hatəšî‘îṯ ləmāləḵwō b^aḥōḏeš hā‘ăśîrî be‘āśwōr l^aḥōḏeš bā’ nəḇuḵaḏəne’ṣṣar meleḵə-bāḇel hû’ wəḵāl-ḥêlwō ‘al-yərûšālaim wayyiḥan ‘āleyhā wayyiḇənû ‘āleyhā dāyēq sāḇîḇ:

2 watāḇō’ hā‘îr bammāṣwōr ‘aḏ ‘ašətê ‘eśərēh šānâ lammeleḵə ṣiḏəqîyâû:

3 bəṯišə‘â l^aḥōḏeš wayyeḥĕzaq hārā‘āḇ bā‘îr wəlō’-hāyâ leḥem lə‘am hā’āreṣ:

4 watibāq^a‘ hā‘îr wəḵāl-’anəšê hammiləḥāmâ| hallayəlâ dereḵə š^a‘ar| bên h^aḥōmōṯayim ’ăšer ‘al-gan hammeleḵə wəḵaśədîm ‘al-hā‘îr sāḇîḇ wayyēleḵə dereḵə hā‘ărāḇâ:

5 wayyirədəfû ḥêl-kaśədîm ’^aḥar hammeleḵə wayyaśśiḡû ’ōṯwō bə‘arəḇwōṯ yərēḥwō wəḵāl-ḥêlwō nāfōṣû mē‘ālāyw:

6 wayyiṯəpəśû ’eṯ-hammeleḵə wayy^a‘ălû ’ōṯwō ’el-meleḵə bāḇel riḇəlāṯâ wayəḏabərû ’itwō mišəpāṭ:

7 wə’eṯ-bənê ṣiḏəqîyâû šāḥăṭû lə‘ênāyw wə’eṯ-‘ênê ṣiḏəqîyâû ‘iûēr wayya’asərēhû ḇanəḥušətayim wayəḇi’ēhû bāḇel: s

8 ûḇ^aḥōḏeš h^aḥămîšî bəšiḇə‘â l^aḥōḏeš hî’ šənaṯ təš^a‘-‘eśərēh šānâ lammeleḵə nəḇuḵaḏəne’ṣṣar meleḵə-bāḇel bā’ nəḇûzarə’ăḏān raḇ-ṭabāḥîm ‘eḇeḏ meleḵə-bāḇel yərûšālāim:

9 wayyiśərōf ’eṯ-bêṯ-yəhwâ wə’eṯ-bêṯ hammeleḵə wə’ēṯ kāl-bātê yərûšālaim wə’eṯ-kāl-bêṯ gāḏwōl śāraf bā’ēš:

10 wə’eṯ-ḥwōmōṯ yərûšālaim sāḇîḇ nāṯəṣû kāl-ḥêl kaśədîm ’ăšer raḇ-ṭabāḥîm:

11 wə’ēṯ yeṯer hā‘ām hannišə’ārîm bā‘îr wə’eṯ-hannōfəlîm ’ăšer nāfəlû ‘al-hammeleḵə bāḇel wə’ēṯ yeṯer hehāmwōn heḡəlâ nəḇûzarə’ăḏān raḇ-ṭabāḥîm:

12 ûmidallaṯ hā’āreṣ hišə’îr raḇ-ṭabāḥîm ləḵōrəmîm ûləyōḡəḇîm:

13 wə’eṯ-‘ammûḏê hannəḥōšeṯ ’ăšer bêṯ-yəhwâ wə’eṯ-hamməḵōnwōṯ wə’eṯ-yām hannəḥōšeṯ ’ăšer bəḇêṯ-yəhwâ šibərû ḵaśədîm wayyiśə’û ’eṯ-nəḥušətām bāḇelâ:

14 wə’eṯ-hassîrōṯ wə’eṯ-hayyā‘îm wə’eṯ-haməzammərwōṯ wə’eṯ-hakapwōṯ wə’ēṯ kāl-kəlê hannəḥōšeṯ ’ăšer yəšārəṯû-ḇām lāqāḥû:

15 wə’eṯ-hamm^aḥətwōṯ wə’eṯ-hammizərāqwōṯ ’ăšer zâāḇ zâāḇ wa’ăšer-kesef kāsef lāq^aḥ raḇ-ṭabāḥîm:

16 hā‘ammûḏîm| šənayim hayyām hā’eḥāḏ wəhamməḵōnwōṯ ’ăšer-‘āśâ šəlōmōh ləḇêṯ yəhwâ lō’-hāyâ mišəqāl linəḥōšeṯ kāl-hakēlîm hā’ēlleh:

17 šəmōneh ‘eśərēh ’ammâ qwōmaṯ| hā‘ammûḏ hā’eḥāḏ wəḵōṯereṯ ‘ālāyw| nəḥōšeṯ wəqwōmaṯ hakōṯereṯ šālōš ’ammâ ’ammwōṯ ûśəḇāḵâ wərimmōnîm ‘al-hakōṯereṯ sāḇîḇ hakōl nəḥōšeṯ wəḵā’ēlleh l^a‘ammûḏ haššēnî ‘al-haśśəḇāḵâ:

18 wayyiqq^aḥ raḇ-ṭabāḥîm ’eṯ-śərāyâ kōhēn hārō’š wə’eṯ-ṣəfanəyâû kōhēn mišəneh wə’eṯ-šəlōšeṯ šōmərê hassaf:

19 ûmin-hā‘îr lāq^aḥ sārîs ’eḥāḏ ’ă‍šer-hû’ fāqîḏ| ‘al-’anəšê hammiləḥāmâ w^aḥămiššâ ’ănāšîm mērō’ê fənê-hammeleḵə ’ăšer niməṣə’û ḇā‘îr wə’ēṯ hassōfēr śar haṣṣāḇā’ hammaṣəbi’ ’eṯ-‘am hā’āreṣ wəšiššîm ’îš mē‘am hā’āreṣ hanniməṣə’îm bā‘îr:

20 wayyiqq^aḥ ’ōṯām nəḇûzarə’ăḏān raḇ-ṭabāḥîm wayyōleḵə ’ōṯām ‘al-meleḵə bāḇel riḇəlāṯâ:

21 wayyaḵə ’ōṯām meleḵə bāḇel wayəmîṯēm bəriḇəlâ bə’ereṣ ḥămāṯ wayyiḡel yəhûḏâ mē‘al ’aḏəmāṯwō:

22 wəhā‘ām hannišə’ār bə’ereṣ yəhûḏâ ’ăšer hišə’îr nəḇûḵaḏəne’ṣṣar meleḵə bāḇel wayyafəqēḏ ‘ălêhem ’eṯ-gəḏaləyâû ben-’ăḥîqām ben-šāfān: f

23 wayyišəmə‘û ḵāl-śārê h^aḥăyālîm hēmmâ wəhā’ănāšîm kî-hifəqîḏ meleḵə-bāḇel ’eṯ-gəḏaləyâû wayyāḇō’û ’el-gəḏaləyâû hammiṣəpâ wəyišəmā‘ē’l ben-nəṯanəyâ wəywōḥānān ben-qārēḥa ûśərāyâ ḇen-tanəḥumeṯ hannəṭōfāṯî wəya’ăzanəyâû ben-hamm^a‘ăḵāṯî hēmmâ wə’anəšêhem:

24 wayyiššāḇ^a‘ lâem gəḏaləyâû ûlə’anəšêhem wayyō’mer lâem ’al-tîrə’û mē‘aḇəḏê hakaśədîm šəḇû ḇā’āreṣ wə‘iḇəḏû ’eṯ-meleḵə bāḇel wəyiṭaḇ lāḵem: s

25 wayəhî| b^aḥōḏeš haššəḇî‘î bā’ yišəmā‘ē’l ben-nəṯanəyâ ben-’ĕlîšāmā‘ mizzer^a‘ hamməlûḵâ w^a‘ăśārâ ’ănāšîm ’itwō wayyakû ’eṯ-gəḏaləyâû wayyāmōṯ wə’eṯ-hayyəhûḏîm wə’eṯ-hakaśədîm ’ăšer-hāyû ’itwō bammiṣəpâ:

26 wayyāqumû ḵāl-hā‘ām miqqāṭōn wə‘aḏ-gāḏwōl wəśārê h^aḥăyālîm wayyāḇō’û miṣərāyim kî yārə’û mipənê ḵaśədîm: f

27 wayəhî ḇišəlōšîm wāšeḇ^a‘ šānâ ləḡālûṯ yəhwōyāḵîn meleḵə-yəhûḏâ bišənêm ‘āśār ḥōḏeš bə‘eśərîm wəšiḇə‘â l^aḥōḏeš nāśā’ ’ĕwîl mərōḏaḵə meleḵə bāḇel bišənaṯ māləḵwō ’eṯ-rō’š yəhwōyāḵîn meleḵə-yəhûḏâ mibêṯ kele’:

28 wayəḏabēr ’itwō ṭōḇwōṯ wayyitēn ’eṯ-kisə’wō mē‘al kissē’ hamməlāḵîm ’ăšer ’itwō bəḇāḇel:

29 wəšinnā’ ’ēṯ biḡəḏê ḵilə’wō wə’āḵal leḥem tāmîḏ ləfānāyw kāl-yəmê ḥayyāyw:

30 wa’ăruḥāṯwō ’ăruḥaṯ tāmîḏ nitənâ-llwō mē’ēṯ hammeleḵə dəḇar-ywōm bəywōmwō kōl yəmê ḥayyāw: