‎1 ‏וַיְהִי֙ כְּכַלּ֣וֹת שְׁלֹמֹ֔ה לִבְנ֥וֹת אֶת־בֵּית־יְהוָ֖ה וְאֶת־בֵּ֣ית הַמֶּ֑לֶךְ וְאֵת֙ כָּל־חֵ֣שֶׁק שְׁלֹמֹ֔ה אֲשֶׁ֥ר חָפֵ֖ץ לַעֲשֽׂוֹת׃ פ

‎2 ‏וַיֵּרָ֧א יְהוָ֛ה אֶל־שְׁלֹמֹ֖ה שֵׁנִ֑ית כַּאֲשֶׁ֛ר נִרְאָ֥ה אֵלָ֖יו בְּגִבְעֽוֹן׃

‎3 ‏וַיֹּ֨אמֶר יְהוָ֜ה אֵלָ֗יו שָׁ֠מַעְתִּי אֶת־תְּפִלָּתְךָ֣ וְאֶת־תְּחִנָּתְךָ֮ אֲשֶׁ֣ר הִתְחַנַּ֣נְתָּה לְפָנַי֒ הִקְדַּ֗שְׁתִּי אֶת־הַבַּ֤יִת הַזֶּה֙ אֲשֶׁ֣ר בָּנִ֔תָה לָשֽׂוּם־שְׁמִ֥י שָׁ֖ם עַד־עוֹלָ֑ם וְהָי֨וּ עֵינַ֧י וְלִבִּ֛י שָׁ֖ם כָּל־הַיָּמִֽים׃

‎4 ‏וְאַתָּ֞ה אִם־תֵּלֵ֣ךְ לְפָנַ֗י כַּאֲשֶׁ֨ר הָלַ֜ךְ דָּוִ֤ד אָבִ֙יךָ֙ בְּתָם־לֵבָ֣ב וּבְיֹ֔שֶׁר לַעֲשׂ֕וֹת כְּכֹ֖ל אֲשֶׁ֣ר צִוִּיתִ֑יךָ חֻקַּ֥י וּמִשְׁפָּטַ֖י תִּשְׁמֹֽר׃

‎5 ‏וַהֲקִ֨מֹתִ֜י אֶת־כִּסֵּ֧א מַֽמְלַכְתְּךָ֛ עַל־יִשְׂרָאֵ֖ל לְעֹלָ֑ם כַּאֲשֶׁ֣ר דִּבַּ֗רְתִּי עַל־דָּוִ֤ד אָבִ֙יךָ֙ לֵאמֹ֔ר לֹֽא־יִכָּרֵ֤ת לְךָ֙ אִ֔ישׁ מֵעַ֖ל כִּסֵּ֥א יִשְׂרָאֵֽל׃

‎6 ‏אִם־שׁ֨וֹב תְּשֻׁב֜וּן אַתֶּ֤ם וּבְנֵיכֶם֙ מֵֽאַחֲרַ֔י וְלֹ֤א תִשְׁמְרוּ֙ מִצְוֹתַ֣י חֻקֹּתַ֔י אֲשֶׁ֥ר נָתַ֖תִּי לִפְנֵיכֶ֑ם וַהֲלַכְתֶּ֗ם וַעֲבַדְתֶּם֙ אֱלֹהִ֣ים אֲחֵרִ֔ים וְהִשְׁתַּחֲוִיתֶ֖ם לָהֶֽם׃

‎7 ‏וְהִכְרַתִּ֣י אֶת־יִשְׂרָאֵ֗ל מֵעַ֨ל פְּנֵ֤י הָאֲדָמָה֙ אֲשֶׁ֣ר נָתַ֣תִּי לָהֶ֔ם וְאֶת־הַבַּ֙יִת֙ אֲשֶׁ֣ר הִקְדַּ֣שְׁתִּי לִשְׁמִ֔י אֲשַׁלַּ֖ח מֵעַ֣ל פָּנָ֑י וְהָיָ֧ה יִשְׂרָאֵ֛ל לְמָשָׁ֥ל וְלִשְׁנִינָ֖ה בְּכָל־הָעַמִּֽים׃

‎8 ‏וְהַבַּ֤יִת הַזֶּה֙ יִהְיֶ֣ה עֶלְי֔וֹן כָּל־עֹבֵ֥ר עָלָ֖יו יִשֹּׁ֣ם וְשָׁרָ֑ק וְאָמְר֗וּ עַל־מֶ֨ה עָשָׂ֤ה יְהוָה֙ כָּ֔כָה לָאָ֥רֶץ הַזֹּ֖את וְלַבַּ֥יִת הַזֶּֽה׃

‎9 ‏וְאָמְר֗וּ עַל֩ אֲשֶׁ֨ר עָזְב֜וּ אֶת־יְהוָ֣ה אֱלֹהֵיהֶ֗ם אֲשֶׁ֨ר הוֹצִ֣יא אֶת־אֲבֹתָם֮ מֵאֶ֣רֶץ מִצְרַיִם֒ וַֽיַּחֲזִ֙קוּ֙ בֵּאלֹהִ֣ים אֲחֵרִ֔ים וישתחו וַיִּשְׁתַּחֲו֥וּ לָהֶ֖ם וַיַּעַבְדֻ֑ם עַל־כֵּ֗ן הֵבִ֤יא יְהוָה֙ עֲלֵיהֶ֔ם אֵ֥ת כָּל־הָרָעָ֖ה הַזֹּֽאת׃ פ

‎10 ‏וַיְהִ֗י מִקְצֵה֙ עֶשְׂרִ֣ים שָׁנָ֔ה אֲשֶׁר־בָּנָ֥ה שְׁלֹמֹ֖ה אֶת־שְׁנֵ֣י הַבָּתִּ֑ים אֶת־בֵּ֥ית יְהוָ֖ה וְאֶת־בֵּ֥ית הַמֶּֽלֶךְ׃

‎11 ‏חִירָ֣ם מֶֽלֶךְ־צֹ֠ר נִשָּׂ֨א אֶת־שְׁלֹמֹ֜ה בַּעֲצֵי֩ אֲרָזִ֨ים וּבַעֲצֵ֧י בְרוֹשִׁ֛ים וּבַזָּהָ֖ב לְכָל־חֶפְצ֑וֹ אָ֡ז יִתֵּן֩ הַמֶּ֨לֶךְ שְׁלֹמֹ֤ה לְחִירָם֙ עֶשְׂרִ֣ים עִ֔יר בְּאֶ֖רֶץ הַגָּלִֽיל׃

‎12 ‏וַיֵּצֵ֤א חִירָם֙ מִצֹּ֔ר לִרְאוֹת֙ אֶת־הֶ֣עָרִ֔ים אֲשֶׁ֥ר נָתַן־ל֖וֹ שְׁלֹמֹ֑ה וְלֹ֥א יָשְׁר֖וּ בְּעֵינָֽיו׃

‎13 ‏וַיֹּ֕אמֶר מָ֚ה הֶעָרִ֣ים הָאֵ֔לֶּה אֲשֶׁר־נָתַ֥תָּה לִּ֖י אָחִ֑י וַיִּקְרָ֤א לָהֶם֙ אֶ֣רֶץ כָּב֔וּל עַ֖ד הַיּ֥וֹם הַזֶּֽה׃ פ

‎14 ‏וַיִּשְׁלַ֥ח חִירָ֖ם לַמֶּ֑לֶךְ מֵאָ֥ה וְעֶשְׂרִ֖ים כִּכַּ֥ר זָהָֽב׃

‎15 ‏וְזֶ֨ה דְבַר־הַמַּ֜ס אֲשֶֽׁר־הֶעֱלָ֣ה׀ הַמֶּ֣לֶךְ שְׁלֹמֹ֗ה לִבְנוֹת֩ אֶת־בֵּ֨ית יְהוָ֤ה וְאֶת־בֵּיתוֹ֙ וְאֶת־הַמִּלּ֔וֹא וְאֵ֖ת חוֹמַ֣ת יְרוּשָׁלִָ֑ם וְאֶת־חָצֹ֥ר וְאֶת־מְגִדּ֖וֹ וְאֶת־גָּֽזֶר׃

‎16 ‏פַּרְעֹ֨ה מֶֽלֶךְ־מִצְרַ֜יִם עָלָ֗ה וַיִּלְכֹּ֤ד אֶת־גֶּ֙זֶר֙ וַיִּשְׂרְפָ֣הּ בָּאֵ֔שׁ וְאֶת־הַֽכְּנַעֲנִ֛י הַיֹּשֵׁ֥ב בָּעִ֖יר הָרָ֑ג וַֽיִּתְּנָהּ֙ שִׁלֻּחִ֔ים לְבִתּ֖וֹ אֵ֥שֶׁת שְׁלֹמֹֽה׃

‎17 ‏וַיִּ֤בֶן שְׁלֹמֹה֙ אֶת־גָּ֔זֶר וְאֶת־בֵּ֥ית חֹרֹ֖ן תַּחְתּֽוֹן׃

‎18 ‏וְאֶֽת־בַּעֲלָ֛ת וְאֶת־תמר תַּדְמֹ֥ר בַּמִּדְבָּ֖ר בָּאָֽרֶץ׃

‎19 ‏וְאֵ֨ת כָּל־עָרֵ֤י הַֽמִּסְכְּנוֹת֙ אֲשֶׁ֣ר הָי֣וּ לִשְׁלֹמֹ֔ה וְאֵת֙ עָרֵ֣י הָרֶ֔כֶב וְאֵ֖ת עָרֵ֣י הַפָּרָשִׁ֑ים וְאֵ֣ת׀ חֵ֣שֶׁק שְׁלֹמֹ֗ה אֲשֶׁ֤ר חָשַׁק֙ לִבְנ֤וֹת בִּירוּשָׁלִַ֙ם֙ וּבַלְּבָנ֔וֹן וּבְכֹ֖ל אֶ֥רֶץ מֶמְשַׁלְתּֽוֹ׃

‎20 ‏כָּל־הָ֠עָם הַנּוֹתָ֨ר מִן־הָאֱמֹרִ֜י הַחִתִּ֤י הַפְּרִזִּי֙ הַחִוִּ֣י וְהַיְבוּסִ֔י אֲשֶׁ֛ר לֹֽא־מִבְּנֵ֥י יִשְׂרָאֵ֖ל הֵֽמָּה׃

‎21 ‏בְּנֵיהֶ֗ם אֲשֶׁ֨ר נֹתְר֤וּ אַחֲרֵיהֶם֙ בָּאָ֔רֶץ אֲשֶׁ֧ר לֹֽא־יָכְל֛וּ בְּנֵ֥י יִשְׂרָאֵ֖ל לְהַֽחֲרִימָ֑ם וַיַּעֲלֵ֤ם שְׁלֹמֹה֙ לְמַס־עֹבֵ֔ד עַ֖ד הַיּ֥וֹם הַזֶּֽה׃

‎22 ‏וּמִבְּנֵי֙ יִשְׂרָאֵ֔ל לֹֽא־נָתַ֥ן שְׁלֹמֹ֖ה עָ֑בֶד כִּי־הֵ֞ם אַנְשֵׁ֣י הַמִּלְחָמָ֗ה וַעֲבָדָיו֙ וְשָׂרָ֣יו וְשָׁלִשָׁ֔יו וְשָׂרֵ֥י רִכְבּ֖וֹ וּפָרָשָֽׁיו׃ ס

‎23 ‏אֵ֣לֶּה׀ שָׂרֵ֣י הַנִּצָּבִ֗ים אֲשֶׁ֤ר עַל־הַמְּלָאכָה֙ לִשְׁלֹמֹ֔ה חֲמִשִּׁ֖ים וַחֲמֵ֣שׁ מֵא֑וֹת הָרֹדִ֣ים בָּעָ֔ם הָעֹשִׂ֖ים בַּמְּלָאכָֽה׃

‎24 ‏אַ֣ךְ בַּת־פַּרְעֹ֗ה עָֽלְתָה֙ מֵעִ֣יר דָּוִ֔ד אֶל־בֵּיתָ֖הּ אֲשֶׁ֣ר בָּֽנָה־לָ֑הּ אָ֖ז בָּנָ֥ה אֶת־הַמִּלּֽוֹא׃

‎25 ‏וְהֶעֱלָ֣ה שְׁלֹמֹ֡ה שָׁלֹשׁ֩ פְּעָמִ֨ים בַּשָּׁנָ֜ה עֹל֣וֹת וּשְׁלָמִ֗ים עַל־הַמִּזְבֵּ֙חַ֙ אֲשֶׁ֣ר בָּנָ֣ה לַיהוָ֔ה וְהַקְטֵ֣יר אִתּ֗וֹ אֲשֶׁ֖ר לִפְנֵ֣י יְהוָ֑ה וְשִׁלַּ֖ם אֶת־הַבָּֽיִת׃

‎26 ‏וָאֳנִ֡י עָשָׂה֩ הַמֶּ֨לֶךְ שְׁלֹמֹ֜ה בְּעֶצְיֽוֹן־גֶּ֨בֶר אֲשֶׁ֧ר אֶת־אֵל֛וֹת עַל־שְׂפַ֥ת יַם־ס֖וּף בְּאֶ֥רֶץ אֱדֽוֹם׃

‎27 ‏וַיִּשְׁלַ֨ח חִירָ֤ם בָּֽאֳנִי֙ אֶת־עֲבָדָ֔יו אַנְשֵׁ֣י אֳנִיּ֔וֹת יֹדְעֵ֖י הַיָּ֑ם עִ֖ם עַבְדֵ֥י שְׁלֹמֹֽה׃

‎28 ‏וַיָּבֹ֣אוּ אוֹפִ֔ירָה וַיִּקְח֤וּ מִשָּׁם֙ זָהָ֔ב אַרְבַּע־מֵא֥וֹת וְעֶשְׂרִ֖ים כִּכָּ֑ר וַיָּבִ֖אוּ אֶל־הַמֶּ֥לֶךְ שְׁלֹמֹֽה׃ פ

1 wayəhî kəḵallwōṯ šəlōmōh liḇənwōṯ ’eṯ-bêṯ-yəhwâ wə’eṯ-bêṯ hammeleḵə wə’ēṯ kāl-ḥēšeq šəlōmōh ’ăšer ḥāfēṣ l^a‘ăśwōṯ: f

2 wayyērā’ yəhwâ ’el-šəlōmōh šēnîṯ ka’ăšer nirə’â ’ēlāyw bəḡiḇə‘wōn:

3 wayyō’mer yəhwâ ’ēlāyw šām^a‘ətî ’eṯ-təfillāṯəḵā wə’eṯ-təḥinnāṯəḵā ’ăšer hiṯəḥannanətâ ləfānay hiqədašətî ’eṯ-habayiṯ hazzeh ’ăšer bāniṯâ lāśûm-šəmî šām ‘aḏ-‘wōlām wəhāyû ‘ênay wəlibî šām kāl-hayyāmîm:

4 wə’atâ ’im-tēlēḵə ləfānay ka’ăšer hālaḵə dāwiḏ ’āḇîḵā bəṯām-lēḇāḇ ûḇəyōšer l^a‘ăśwōṯ kəḵōl ’ăšer ṣiûîṯîḵā ḥuqqay ûmišəpāṭay tišəmōr:

5 wahăqimōṯî ’eṯ-kissē’ maməlaḵətəḵā ‘al-yiśərā’ēl lə‘ōlām ka’ăšer dibarətî ‘al-dāwiḏ ’āḇîḵā lē’mōr lō’-yikārēṯ ləḵā ’îš mē‘al kissē’ yiśərā’ēl:

6 ’im-šwōḇ təšuḇûn ’atem ûḇənêḵem mē’^aḥăray wəlō’ ṯišəmərû miṣəwōṯay ḥuqqōṯay ’ăšer nāṯatî lifənêḵem wahălaḵətem w^a‘ăḇaḏətem ’ĕlōhîm ’ăḥērîm wəhišət^aḥăwîṯem lâem:

7 wəhiḵəratî ’eṯ-yiśərā’ēl mē‘al pənê hā’ăḏāmâ ’ăšer nāṯatî lâem wə’eṯ-habayiṯ ’ăšer hiqədašətî lišəmî ’ăšall^aḥ mē‘al pānāy wəhāyâ yiśərā’ēl ləmāšāl wəlišənînâ bəḵāl-hā‘ammîm:

8 wəhabayiṯ hazzeh yihəyeh ‘eləywōn kāl-‘ōḇēr ‘ālāyw yiššōm wəšārāq wə’āmərû ‘al-meh ‘āśâ yəhwâ kāḵâ lā’āreṣ hazzō’ṯ wəlabayiṯ hazzeh:

9 wə’āmərû ‘al ’ăšer ‘āzəḇû ’eṯ-yəhwâ ’ĕlōhêhem ’ăšer hwōṣî’ ’eṯ-’ăḇōṯām mē’ereṣ miṣərayim wayy^aḥăziqû bē’lōhîm ’ăḥērîm wayyišət^aḥû wayyišət^aḥăwû lâem wayy^a‘aḇəḏum ‘al-kēn hēḇî’ yəhwâ ‘ălêhem ’ēṯ kāl-hārā‘â hazzō’ṯ: f

10 wayəhî miqəṣēh ‘eśərîm šānâ ’ăšer-bānâ šəlōmōh ’eṯ-šənê habātîm ’eṯ-bêṯ yəhwâ wə’eṯ-bêṯ hammeleḵə:

11 ḥîrām meleḵə-ṣōr niśśā’ ’eṯ-šəlōmōh b^a‘ăṣê ’ărāzîm ûḇ^a‘ăṣê ḇərwōšîm ûḇazzâāḇ ləḵāl-ḥefəṣwō ’āz yitēn hammeleḵə šəlōmōh ləḥîrām ‘eśərîm ‘îr bə’ereṣ hagālîl:

12 wayyēṣē’ ḥîrām miṣṣōr lirə’wōṯ ’eṯ-he‘ārîm ’ăšer nāṯan-lwō šəlōmōh wəlō’ yāšərû bə‘ênāyw:

13 wayyō’mer mâ he‘ārîm hā’ēlleh ’ăšer-nāṯatâ llî ’āḥî wayyiqərā’ lâem ’ereṣ kāḇûl ‘aḏ hayywōm hazzeh: f

14 wayyišəl^aḥ ḥîrām lammeleḵə mē’â wə‘eśərîm kikar zâāḇ:

15 wəzeh ḏəḇar-hammas ’ăšer-he‘ĕlâ| hammeleḵə šəlōmōh liḇənwōṯ ’eṯ-bêṯ yəhwâ wə’eṯ-bêṯwō wə’eṯ-hammillwō’ wə’ēṯ ḥwōmaṯ yərûšālāim wə’eṯ-ḥāṣōr wə’eṯ-məḡidwō wə’eṯ-gāzer:

16 parə‘ōh meleḵə-miṣərayim ‘ālâ wayyiləkōḏ ’eṯ-gezer wayyiśərəfāh bā’ēš wə’eṯ-hakən^a‘ănî hayyōšēḇ bā‘îr hārāḡ wayyitənāh šilluḥîm ləḇitwō ’ēšeṯ šəlōmōh:

17 wayyiḇen šəlōmōh ’eṯ-gāzer wə’eṯ-bêṯ ḥōrōn t^aḥətwōn:

18 wə’eṯ-b^a‘ălāṯ wə’eṯ-tāmār taḏəmōr bammiḏəbār bā’āreṣ:

19 wə’ēṯ kāl-‘ārê hammisəkənwōṯ ’ăšer hāyû lišəlōmōh wə’ēṯ ‘ārê hāreḵeḇ wə’ēṯ ‘ārê hapārāšîm wə’ēṯ| ḥēšeq šəlōmōh ’ăšer ḥāšaq liḇənwōṯ bîrûšālaim ûḇalləḇānwōn ûḇəḵōl ’ereṣ meməšalətwō:

20 kāl-hā‘ām hannwōṯār min-hā’ĕmōrî h^aḥitî hapərizzî h^aḥiûî wəhayəḇûsî ’ăšer lō’-mibənê yiśərā’ēl hēmmâ:

21 bənêhem ’ăšer nōṯərû ’^aḥărêhem bā’āreṣ ’ăšer lō’-yāḵəlû bənê yiśərā’ēl ləh^aḥărîmām wayy^a‘ălēm šəlōmōh ləmas-‘ōḇēḏ ‘aḏ hayywōm hazzeh:

22 ûmibənê yiśərā’ēl lō’-nāṯan šəlōmōh ‘āḇeḏ kî-hēm ’anəšê hammiləḥāmâ w^a‘ăḇāḏāyw wəśārāyw wəšālišāyw wəśārê riḵəbwō ûfārāšāyw: s

23 ’ēlleh| śārê hanniṣṣāḇîm ’ăšer ‘al-hamməlā’ḵâ lišəlōmōh ḥămiššîm w^aḥămēš mē’wōṯ hārōḏîm bā‘ām hā‘ōśîm bamməlā’ḵâ:

24 ’aḵə baṯ-parə‘ōh ‘āləṯâ mē‘îr dāwiḏ ’el-bêṯāh ’ăšer bānâ-lāh ’āz bānâ ’eṯ-hammillwō’:

25 wəhe‘ĕlâ šəlōmōh šālōš pə‘āmîm baššānâ ‘ōlwōṯ ûšəlāmîm ‘al-hammizəbēḥa ’ăšer bānâ layhwâ wəhaqəṭêr ’itwō ’ăšer lifənê yəhwâ wəšillam ’eṯ-habāyiṯ:

26 wā’ŏnî ‘āśâ hammeleḵə šəlōmōh bə‘eṣəywōn-geḇer ’ăšer ’eṯ-’ēlwōṯ ‘al-śəfaṯ yam-sûf bə’ereṣ ’ĕḏwōm:

27 wayyišəl^aḥ ḥîrām bā’ŏnî ’eṯ-‘ăḇāḏāyw ’anəšê ’ŏnîywōṯ yōḏə‘ê hayyām ‘im ‘aḇəḏê šəlōmōh:

28 wayyāḇō’û ’wōfîrâ wayyiqəḥû miššām zâāḇ ’arəb^a‘-mē’wōṯ wə‘eśərîm kikār wayyāḇi’û ’el-hammeleḵə šəlōmōh: f