‎1 ‏וַיִּצָּעֵק֙ אִ֣ישׁ אֶפְרַ֔יִם וַֽיַּעֲבֹ֖ר צָפ֑וֹנָה וַיֹּאמְר֨וּ לְיִפְתָּ֜ח מַדּ֣וּעַ׀ עָבַ֣רְתָּ׀ לְהִלָּחֵ֣ם בִּבְנֵי־עַמּ֗וֹן וְלָ֙נוּ֙ לֹ֤א קָרָ֙אתָ֙ לָלֶ֣כֶת עִמָּ֔ךְ בֵּיתְךָ֕ נִשְׂרֹ֥ף עָלֶ֖יךָ בָּאֵֽשׁ׃

‎2 ‏וַיֹּ֤אמֶר יִפְתָּח֙ אֲלֵיהֶ֔ם אִ֣ישׁ רִ֗יב הָיִ֛יתִי אֲנִ֛י וְעַמִּ֥י וּבְנֵֽי־עַמּ֖וֹן מְאֹ֑ד וָאֶזְעַ֣ק אֶתְכֶ֔ם וְלֹֽא־הוֹשַׁעְתֶּ֥ם אוֹתִ֖י מִיָּדָֽם׃

‎3 ‏וָֽאֶרְאֶ֞ה כִּֽי־אֵינְךָ֣ מוֹשִׁ֗יעַ וָאָשִׂ֨ימָה נַפְשִׁ֤י בְכַפִּי֙ וָֽאֶעְבְּרָה֙ אֶל־בְּנֵ֣י עַמּ֔וֹן וַיִּתְּנֵ֥ם יְהוָ֖ה בְּיָדִ֑י וְלָמָ֞ה עֲלִיתֶ֥ם אֵלַ֛י הַיּ֥וֹם הַזֶּ֖ה לְהִלָּ֥חֶם בִּֽי׃

‎4 ‏וַיִּקְבֹּ֤ץ יִפְתָּח֙ אֶת־כָּל־אַנְשֵׁ֣י גִלְעָ֔ד וַיִּלָּ֖חֶם אֶת־אֶפְרָ֑יִם וַיַּכּוּ֩ אַנְשֵׁ֨י גִלְעָ֜ד אֶת־אֶפְרַ֗יִם כִּ֤י אָמְרוּ֙ פְּלִיטֵ֤י אֶפְרַ֙יִם֙ אַתֶּ֔ם גִּלְעָ֕ד בְּת֥וֹךְ אֶפְרַ֖יִם בְּת֥וֹךְ מְנַשֶּֽׁה׃

‎5 ‏וַיִּלְכֹּ֥ד גִּלְעָ֛ד אֶֽת־מַעְבְּר֥וֹת הַיַּרְדֵּ֖ן לְאֶפְרָ֑יִם וְֽ֠הָיָה כִּ֣י יֹאמְר֞וּ פְּלִיטֵ֤י אֶפְרַ֙יִם֙ אֶעֱבֹ֔רָה וַיֹּ֨אמְרוּ ל֧וֹ אַנְשֵֽׁי־גִלְעָ֛ד הַֽאֶפְרָתִ֥י אַ֖תָּה וַיֹּ֥אמֶֽר׀ לֹֽא׃

‎6 ‏וַיֹּ֣אמְרוּ לוֹ֩ אֱמָר־נָ֨א שִׁבֹּ֜לֶת וַיֹּ֣אמֶר סִבֹּ֗לֶת וְלֹ֤א יָכִין֙ לְדַבֵּ֣ר כֵּ֔ן וַיֹּאחֲז֣וּ אוֹת֔וֹ וַיִּשְׁחָט֖וּהוּ אֶל־מַעְבְּר֣וֹת הַיַּרְדֵּ֑ן וַיִּפֹּ֞ל בָּעֵ֤ת הַהִיא֙ מֵֽאֶפְרַ֔יִם אַרְבָּעִ֥ים וּשְׁנַ֖יִם אָֽלֶף׃

‎7 ‏וַיִּשְׁפֹּ֥ט יִפְתָּ֛ח אֶת־יִשְׂרָאֵ֖ל שֵׁ֣שׁ שָׁנִ֑ים וַיָּ֗מָת יִפְתָּח֙ הַגִּלְעָדִ֔י וַיִּקָּבֵ֖ר בְּעָרֵ֥י גִלְעָֽד׃ פ

‎8 ‏וַיִּשְׁפֹּ֤ט אַֽחֲרָיו֙ אֶת־יִשְׂרָאֵ֔ל אִבְצָ֖ן מִבֵּ֥ית לָֽחֶם׃

‎9 ‏וַיְהִי־ל֞וֹ שְׁלֹשִׁ֣ים בָּנִ֗ים וּשְׁלֹשִׁ֤ים בָּנוֹת֙ שִׁלַּ֣ח הַח֔וּצָה וּשְׁלֹשִׁ֣ים בָּנ֔וֹת הֵבִ֥יא לְבָנָ֖יו מִן־הַח֑וּץ וַיִּשְׁפֹּ֥ט אֶת־יִשְׂרָאֵ֖ל שֶׁ֥בַע שָׁנִֽים׃

‎10 ‏וַיָּ֣מָת אִבְצָ֔ן וַיִּקָּבֵ֖ר בְּבֵ֥ית לָֽחֶם׃ פ

‎11 ‏וַיִּשְׁפֹּ֤ט אַֽחֲרָיו֙ אֶת־יִשְׂרָאֵ֔ל אֵיל֖וֹן הַזְּבֽוּלֹנִ֑י וַיִּשְׁפֹּ֥ט אֶת־יִשְׂרָאֵ֖ל עֶ֥שֶׂר שָׁנִֽים׃

‎12 ‏וַיָּ֖מָת אֵל֣וֹן הַזְּבֽוּלֹנִ֑י וַיִּקָּבֵ֥ר בְּאַיָּל֖וֹן בְּאֶ֥רֶץ זְבוּלֻֽן׃ פ

‎13 ‏וַיִּשְׁפֹּ֥ט אַחֲרָ֖יו אֶת־יִשְׂרָאֵ֑ל עַבְדּ֥וֹן בֶּן־הִלֵּ֖ל הַפִּרְעָתוֹנִֽי׃

‎14 ‏וַיְהִי־ל֞וֹ אַרְבָּעִ֣ים בָּנִ֗ים וּשְׁלֹשִׁים֙ בְּנֵ֣י בָנִ֔ים רֹכְבִ֖ים עַל־שִׁבְעִ֣ים עֲיָרִ֑ם וַיִּשְׁפֹּ֥ט אֶת־יִשְׂרָאֵ֖ל שְׁמֹנֶ֥ה שָׁנִֽים׃

‎15 ‏וַיָּ֛מָת עַבְדּ֥וֹן בֶּן־הִלֵּ֖ל הַפִּרְעָתוֹנִ֑י וַיִּקָּבֵ֤ר בְּפִרְעָתוֹן֙ בְּאֶ֣רֶץ אֶפְרַ֔יִם בְּהַ֖ר הָעֲמָלֵקִֽי׃ פ

1 wayyiṣṣā‘ēq ’îš ’efərayim wayy^a‘ăḇōr ṣāfwōnâ wayyō’mərû ləyifətāḥ madû‘a| ‘āḇarətā| ləhillāḥēm biḇənê-‘ammwōn wəlānû lō’ qārā’ṯā lāleḵeṯ ‘immāḵə bêṯəḵā niśərōf ‘āleyḵā bā’ēš:

2 wayyō’mer yifətāḥ ’ălêhem ’îš rîḇ hāyîṯî ’ănî wə‘ammî ûḇənê-‘ammwōn mə’ōḏ wā’ezə‘aq ’eṯəḵem wəlō’-hwōš^a‘ətem ’wōṯî mîyāḏām:

3 wā’erə’eh kî-’ênəḵā mwōšî‘a wā’āśîmâ nafəšî ḇəḵapî wā’e‘əbərâ ’el-bənê ‘ammwōn wayyitənēm yəhwâ bəyāḏî wəlāmâ ‘ălîṯem ’ēlay hayywōm hazzeh ləhillāḥem bî:

4 wayyiqəbōṣ yifətāḥ ’eṯ-kāl-’anəšê ḡilə‘āḏ wayyillāḥem ’eṯ-’efərāyim wayyakû ’anəšê ḡilə‘āḏ ’eṯ-’efərayim kî ’āmərû pəlîṭê ’efərayim ’atem gilə‘āḏ bəṯwōḵə ’efərayim bəṯwōḵə mənaššeh:

5 wayyiləkōḏ gilə‘āḏ ’eṯ-m^a‘əbərwōṯ hayyarədēn lə’efərāyim wəhāyâ kî yō’mərû pəlîṭê ’efərayim ’e‘ĕḇōrâ wayyō’mərû lwō ’anəšê-ḡilə‘āḏ ha’efərāṯî ’atâ wayyō’mer| lō’:

6 wayyō’mərû lwō ’ĕmār-nā’ šibōleṯ wayyō’mer sibōleṯ wəlō’ yāḵîn ləḏabēr kēn wayyō’ḥăzû ’wōṯwō wayyišəḥāṭûhû ’el-m^a‘əbərwōṯ hayyarədēn wayyipōl bā‘ēṯ hahî’ mē’efərayim ’arəbā‘îm ûšənayim ’ālef:

7 wayyišəpōṭ yifətāḥ ’eṯ-yiśərā’ēl šēš šānîm wayyāmāṯ yifətāḥ hagilə‘āḏî wayyiqqāḇēr bə‘ārê ḡilə‘āḏ: f

8 wayyišəpōṭ ’^aḥărāyw ’eṯ-yiśərā’ēl ’iḇəṣān mibêṯ lāḥem:

9 wayəhî-lwō šəlōšîm bānîm ûšəlōšîm bānwōṯ šill^aḥ h^aḥûṣâ ûšəlōšîm bānwōṯ hēḇî’ ləḇānāyw min-h^aḥûṣ wayyišəpōṭ ’eṯ-yiśərā’ēl šeḇ^a‘ šānîm:

10 wayyāmāṯ ’iḇəṣān wayyiqqāḇēr bəḇêṯ lāḥem: f

11 wayyišəpōṭ ’^aḥărāyw ’eṯ-yiśərā’ēl ’êlwōn hazzəḇûlōnî wayyišəpōṭ ’eṯ-yiśərā’ēl ‘eśer šānîm:

12 wayyāmāṯ ’ēlwōn hazzəḇûlōnî wayyiqqāḇēr bə’ayyālwōn bə’ereṣ zəḇûlun: f

13 wayyišəpōṭ ’^aḥărāyw ’eṯ-yiśərā’ēl ‘aḇədwōn ben-hillēl hapirə‘āṯwōnî:

14 wayəhî-lwō ’arəbā‘îm bānîm ûšəlōšîm bənê ḇānîm rōḵəḇîm ‘al-šiḇə‘îm ‘ăyārim wayyišəpōṭ ’eṯ-yiśərā’ēl šəmōneh šānîm:

15 wayyāmāṯ ‘aḇədwōn ben-hillēl hapirə‘āṯwōnî wayyiqqāḇēr bəfirə‘āṯwōn bə’ereṣ ’efərayim bəhar hā‘ămālēqî: f