‎1 ‏וְאֵ֤לֶּה הַגּוֹיִם֙ אֲשֶׁ֣ר הִנִּ֣יחַ יְהוָ֔ה לְנַסּ֥וֹת בָּ֖ם אֶת־יִשְׂרָאֵ֑ל אֵ֚ת כָּל־אֲשֶׁ֣ר לֹֽא־יָדְע֔וּ אֵ֖ת כָּל־מִלְחֲמ֥וֹת כְּנָֽעַן׃

‎2 ‏רַ֗ק לְמַ֙עַן֙ דַּ֚עַת דֹּר֣וֹת בְּנֵֽי־יִשְׂרָאֵ֔ל לְלַמְּדָ֖ם מִלְחָמָ֑ה רַ֥ק אֲשֶׁר־לְפָנִ֖ים לֹ֥א יְדָעֽוּם׃

‎3 ‏חֲמֵ֣שֶׁת׀ סַרְנֵ֣י פְלִשְׁתִּ֗ים וְכָל־הַֽכְּנַעֲנִי֙ וְהַצִּ֣ידֹנִ֔י וְהַ֣חִוִּ֔י יֹשֵׁ֖ב הַ֣ר הַלְּבָנ֑וֹן מֵהַר֙ בַּ֣עַל חֶרְמ֔וֹן עַ֖ד לְב֥וֹא חֲמָֽת׃

‎4 ‏וַֽיִּהְי֕וּ לְנַסּ֥וֹת בָּ֖ם אֶת־יִשְׂרָאֵ֑ל לָדַ֗עַת הֲיִשְׁמְעוּ֙ אֶת־מִצְוֹ֣ת יְהוָ֔ה אֲשֶׁר־צִוָּ֥ה אֶת־אֲבוֹתָ֖ם בְּיַד־מֹשֶֽׁה׃

‎5 ‏וּבְנֵ֣י יִשְׂרָאֵ֔ל יָשְׁב֖וּ בְּקֶ֣רֶב הַֽכְּנַעֲנִ֑י הַחִתִּ֤י וְהָֽאֱמֹרִי֙ וְהַפְּרִזִּ֔י וְהַחִוִּ֖י וְהַיְבוּסִֽי׃

‎6 ‏וַיִּקְח֨וּ אֶת־בְּנוֹתֵיהֶ֤ם לָהֶם֙ לְנָשִׁ֔ים וְאֶת־בְּנוֹתֵיהֶ֖ם נָתְנ֣וּ לִבְנֵיהֶ֑ם וַיַּעַבְד֖וּ אֶת־אֱלֹהֵיהֶֽם׃ פ

‎7 ‏וַיַּעֲשׂ֨וּ בְנֵי־יִשְׂרָאֵ֤ל אֶת־הָרַע֙ בְּעֵינֵ֣י יְהוָ֔ה וַֽיִּשְׁכְּח֖וּ אֶת־יְהוָ֣ה אֱלֹֽהֵיהֶ֑ם וַיַּעַבְד֥וּ אֶת־הַבְּעָלִ֖ים וְאֶת־הָאֲשֵׁרֽוֹת׃

‎8 ‏וַיִּֽחַר־אַ֤ף יְהוָה֙ בְּיִשְׂרָאֵ֔ל וַֽיִּמְכְּרֵ֗ם בְּיַד֙ כּוּשַׁ֣ן רִשְׁעָתַ֔יִם מֶ֖לֶךְ אֲרַ֣ם נַהֲרָ֑יִם וַיַּעַבְד֧וּ בְנֵֽי־יִשְׂרָאֵ֛ל אֶת־כּוּשַׁ֥ן רִשְׁעָתַ֖יִם שְׁמֹנֶ֥ה שָׁנִֽים׃

‎9 ‏וַיִּזְעֲק֤וּ בְנֵֽי־יִשְׂרָאֵל֙ אֶל־יְהוָ֔ה וַיָּ֨קֶם יְהוָ֥ה מוֹשִׁ֛יעַ לִבְנֵ֥י יִשְׂרָאֵ֖ל וַיּֽוֹשִׁיעֵ֑ם אֵ֚ת עָתְנִיאֵ֣ל בֶּן־קְנַ֔ז אֲחִ֥י כָלֵ֖ב הַקָּטֹ֥ן מִמֶּֽנּוּ׃

‎10 ‏וַתְּהִ֨י עָלָ֥יו רֽוּחַ־יְהוָה֮ וַיִּשְׁפֹּ֣ט אֶת־יִשְׂרָאֵל֒ וַיֵּצֵא֙ לַמִּלְחָמָ֔ה וַיִּתֵּ֤ן יְהוָה֙ בְּיָד֔וֹ אֶת־כּוּשַׁ֥ן רִשְׁעָתַ֖יִם מֶ֣לֶךְ אֲרָ֑ם וַתָּ֣עָז יָד֔וֹ עַ֖ל כּוּשַׁ֥ן רִשְׁעָתָֽיִם׃

‎11 ‏וַתִּשְׁקֹ֥ט הָאָ֖רֶץ אַרְבָּעִ֣ים שָׁנָ֑ה וַיָּ֖מָת עָתְנִיאֵ֥ל בֶּן־קְנַֽז׃ פ

‎12 ‏וַיֹּסִ֙פוּ֙ בְּנֵ֣י יִשְׂרָאֵ֔ל לַעֲשׂ֥וֹת הָרַ֖ע בְּעֵינֵ֣י יְהוָ֑ה וַיְחַזֵּ֨ק יְהוָ֜ה אֶת־עֶגְל֤וֹן מֶֽלֶךְ־מוֹאָב֙ עַל־יִשְׂרָאֵ֔ל עַ֛ל כִּֽי־עָשׂ֥וּ אֶת־הָרַ֖ע בְּעֵינֵ֥י יְהוָֽה׃

‎13 ‏וַיֶּאֱסֹ֣ף אֵלָ֔יו אֶת־בְּנֵ֥י עַמּ֖וֹן וַעֲמָלֵ֑ק וַיֵּ֗לֶךְ וַיַּךְ֙ אֶת־יִשְׂרָאֵ֔ל וַיִּֽירְשׁ֖וּ אֶת־עִ֥יר הַתְּמָרִֽים׃

‎14 ‏וַיַּעַבְד֤וּ בְנֵֽי־יִשְׂרָאֵל֙ אֶת־עֶגְל֣וֹן מֶֽלֶךְ־מוֹאָ֔ב שְׁמוֹנֶ֥ה עֶשְׂרֵ֖ה שָׁנָֽה׃ ס

‎15 ‏וַיִּזְעֲק֣וּ בְנֵֽי־יִשְׂרָאֵל֮ אֶל־יְהוָה֒ וַיָּקֶם֩ יְהוָ֨ה לָהֶ֜ם מוֹשִׁ֗יעַ אֶת־אֵה֤וּד בֶּן־גֵּרָא֙ בֶּן־הַיְמִינִ֔י אִ֥ישׁ אִטֵּ֖ר יַד־יְמִינ֑וֹ וַיִּשְׁלְח֨וּ בְנֵי־יִשְׂרָאֵ֤ל בְּיָדוֹ֙ מִנְחָ֔ה לְעֶגְל֖וֹן מֶ֥לֶךְ מוֹאָֽב׃

‎16 ‏וַיַּעַשׂ֩ ל֨וֹ אֵה֜וּד חֶ֗רֶב וְלָ֛הּ שְׁנֵ֥י פֵי֖וֹת גֹּ֣מֶד אָרְכָּ֑הּ וַיַּחְגֹּ֤ר אוֹתָהּ֙ מִתַּ֣חַת לְמַדָּ֔יו עַ֖ל יֶ֥רֶךְ יְמִינֽוֹ׃

‎17 ‏וַיַּקְרֵב֙ אֶת־הַמִּנְחָ֔ה לְעֶגְל֖וֹן מֶ֣לֶךְ מוֹאָ֑ב וְעֶגְל֕וֹן אִ֥ישׁ בָּרִ֖יא מְאֹֽד׃

‎18 ‏וַֽיְהִי֙ כַּאֲשֶׁ֣ר כִּלָּ֔ה לְהַקְרִ֖יב אֶת־הַמִּנְחָ֑ה וַיְשַׁלַּח֙ אֶת־הָעָ֔ם נֹשְׂאֵ֖י הַמִּנְחָֽה׃

‎19 ‏וְה֣וּא שָׁ֗ב מִן־הַפְּסִילִים֙ אֲשֶׁ֣ר אֶת־הַגִּלְגָּ֔ל וַיֹּ֕אמֶר דְּבַר־סֵ֥תֶר לִ֛י אֵלֶ֖יךָ הַמֶּ֑לֶךְ וַיֹּ֣אמֶר הָ֔ס וַיֵּֽצְאוּ֙ מֵֽעָלָ֔יו כָּל־הָעֹמְדִ֖ים עָלָֽיו׃

‎20 ‏וְאֵה֣וּד׀ בָּ֣א אֵלָ֗יו וְהֽוּא־יֹ֠שֵׁב בַּעֲלִיַּ֨ת הַמְּקֵרָ֤ה אֲשֶׁר־לוֹ֙ לְבַדּ֔וֹ וַיֹּ֣אמֶר אֵה֔וּד דְּבַר־אֱלֹהִ֥ים לִ֖י אֵלֶ֑יךָ וַיָּ֖קָם מֵעַ֥ל הַכִּסֵּֽא׃

‎21 ‏וַיִּשְׁלַ֤ח אֵהוּד֙ אֶת־יַ֣ד שְׂמֹאל֔וֹ וַיִּקַּח֙ אֶת־הַחֶ֔רֶב מֵעַ֖ל יֶ֣רֶךְ יְמִינ֑וֹ וַיִּתְקָעֶ֖הָ בְּבִטְנֽוֹ׃

‎22 ‏וַיָּבֹ֨א גַֽם־הַנִּצָּ֜ב אַחַ֣ר הַלַּ֗הַב וַיִּסְגֹּ֤ר הַחֵ֙לֶב֙ בְּעַ֣ד הַלַּ֔הַב כִּ֣י לֹ֥א שָׁלַ֛ף הַחֶ֖רֶב מִבִּטְנ֑וֹ וַיֵּצֵ֖א הַֽפַּרְשְׁדֹֽנָה׃

‎23 ‏וַיֵּצֵ֥א אֵה֖וּד הַֽמִּסְדְּר֑וֹנָה וַיִּסְגֹּ֞ר דַּלְת֧וֹת הָעַלִיָּ֛ה בַּעֲד֖וֹ וְנָעָֽל׃

‎24 ‏וְה֤וּא יָצָא֙ וַעֲבָדָ֣יו בָּ֔אוּ וַיִּרְא֕וּ וְהִנֵּ֛ה דַּלְת֥וֹת הָעֲלִיָּ֖ה נְעֻל֑וֹת וַיֹּ֣אמְר֔וּ אַ֣ךְ מֵסִ֥יךְ ה֛וּא אֶת־רַגְלָ֖יו בַּחֲדַ֥ר הַמְּקֵרָֽה׃

‎25 ‏וַיָּחִ֣ילוּ עַד־בּ֔וֹשׁ וְהִנֵּ֛ה אֵינֶ֥נּוּ פֹתֵ֖חַ דַּלְת֣וֹת הָֽעֲלִיָּ֖ה וַיִּקְח֤וּ אֶת־הַמַּפְתֵּ֙חַ֙ וַיִּפְתָּ֔חוּ וְהִנֵּה֙ אֲדֹ֣נֵיהֶ֔ם נֹפֵ֥ל אַ֖רְצָה מֵֽת׃

‎26 ‏וְאֵה֥וּד נִמְלַ֖ט עַ֣ד הִֽתְמַהְמְהָ֑ם וְהוּא֙ עָבַ֣ר אֶת־הַפְּסִילִ֔ים וַיִּמָּלֵ֖ט הַשְּׂעִירָֽתָה׃

‎27 ‏וַיְהִ֣י בְּבוֹא֔וֹ וַיִּתְקַ֥ע בַּשּׁוֹפָ֖ר בְּהַ֣ר אֶפְרָ֑יִם וַיֵּרְד֨וּ עִמּ֧וֹ בְנֵֽי־יִשְׂרָאֵ֛ל מִן־הָהָ֖ר וְה֥וּא לִפְנֵיהֶֽם׃

‎28 ‏וַיֹּ֤אמֶר³ אֲלֵהֶם֙ רִדְפ֣וּ אַחֲרַ֔י כִּֽי־נָתַ֨ן יְהוָ֧ה אֶת־אֹיְבֵיכֶ֛ם אֶת־מוֹאָ֖ב בְּיֶדְכֶ֑ם וַיֵּרְד֣וּ אַחֲרָ֗יו וַֽיִּלְכְּד֞וּ אֶת־מַעְבְּר֤וֹת הַיַּרְדֵּן֙ לְמוֹאָ֔ב וְלֹֽא־נָתְנ֥וּ אִ֖ישׁ לַעֲבֹֽר׃

‎29 ‏וַיַּכּ֨וּ אֶת־מוֹאָ֜ב בָּעֵ֣ת הַהִ֗יא כַּעֲשֶׂ֤רֶת אֲלָפִים֙ אִ֔ישׁ כָּל־שָׁמֵ֖ן וְכָל־אִ֣ישׁ חָ֑יִל וְלֹ֥א נִמְלַ֖ט אִֽישׁ׃

‎30 ‏וַתִּכָּנַ֤ע מוֹאָב֙ בַּיּ֣וֹם הַה֔וּא תַּ֖חַת יַ֣ד יִשְׂרָאֵ֑ל וַתִּשְׁקֹ֥ט הָאָ֖רֶץ שְׁמוֹנִ֥ים שָׁנָֽה׃ ס

‎31 ‏וְאַחֲרָ֤יו הָיָה֙ שַׁמְגַּ֣ר בֶּן־עֲנָ֔ת וַיַּ֤ךְ אֶת־פְּלִשְׁתִּים֙ שֵֽׁשׁ־מֵא֣וֹת אִ֔ישׁ בְּמַלְמַ֖ד הַבָּקָ֑ר וַיֹּ֥שַׁע גַּם־ה֖וּא אֶת־יִשְׂרָאֵֽל׃ ס

1 wə’ēlleh hagwōyim ’ăšer hinnîḥa yəhwâ lənasswōṯ bām ’eṯ-yiśərā’ēl ’ēṯ kāl-’ăšer lō’-yāḏə‘û ’ēṯ kāl-miləḥămwōṯ kənā‘an:

2 raq ləm^a‘an d^a‘aṯ dōrwōṯ bənê-yiśərā’ēl ləlamməḏām miləḥāmâ raq ’ăšer-ləfānîm lō’ yəḏā‘ûm:

3 ḥămēšeṯ| sarənê fəlišətîm wəḵāl-hakən^a‘ănî wəhaṣṣîḏōnî wəh^aḥiûî yōšēḇ har halləḇānwōn mēhar b^a‘al ḥerəmwōn ‘aḏ ləḇwō’ ḥămāṯ:

4 wayyihəyû lənasswōṯ bām ’eṯ-yiśərā’ēl lāḏ^a‘aṯ hăyišəmə‘û ’eṯ-miṣəwōṯ yəhwâ ’ăšer-ṣiûâ ’eṯ-’ăḇwōṯām bəyaḏ-mōšeh:

5 ûḇənê yiśərā’ēl yāšəḇû bəqereḇ hakən^a‘ănî h^aḥitî wəhā’ĕmōrî wəhapərizzî wəh^aḥiûî wəhayəḇûsî:

6 wayyiqəḥû ’eṯ-bənwōṯêhem lâem lənāšîm wə’eṯ-bənwōṯêhem nāṯənû liḇənêhem wayy^a‘aḇəḏû ’eṯ-’ĕlōhêhem: f

7 wayy^a‘ăśû ḇənê-yiśərā’ēl ’eṯ-hār^a‘ bə‘ênê yəhwâ wayyišəkəḥû ’eṯ-yəhwâ ’ĕlōhêhem wayy^a‘aḇəḏû ’eṯ-habə‘ālîm wə’eṯ-hā’ăšērwōṯ:

8 wayyiḥar-’af yəhwâ bəyiśərā’ēl wayyiməkərēm bəyaḏ kûšan rišə‘āṯayim meleḵə ’ăram nahărāyim wayy^a‘aḇəḏû ḇənê-yiśərā’ēl ’eṯ-kûšan rišə‘āṯayim šəmōneh šānîm:

9 wayyizə‘ăqû ḇənê-yiśərā’ēl ’el-yəhwâ wayyāqem yəhwâ mwōšî‘a liḇənê yiśərā’ēl wayywōšî‘ēm ’ēṯ ‘āṯənî’ēl ben-qənaz ’ăḥî ḵālēḇ haqqāṭōn mimmennû:

10 watəhî ‘ālāyw rûḥa-yəhwâ wayyišəpōṭ ’eṯ-yiśərā’ēl wayyēṣē’ lammiləḥāmâ wayyitēn yəhwâ bəyāḏwō ’eṯ-kûšan rišə‘āṯayim meleḵə ’ărām watā‘āz yāḏwō ‘al kûšan rišə‘āṯāyim:

11 watišəqōṭ hā’āreṣ ’arəbā‘îm šānâ wayyāmāṯ ‘āṯənî’ēl ben-qənaz: f

12 wayyōsifû bənê yiśərā’ēl l^a‘ăśwōṯ hār^a‘ bə‘ênê yəhwâ wayəḥazzēq yəhwâ ’eṯ-‘eḡəlwōn meleḵə-mwō’āḇ ‘al-yiśərā’ēl ‘al kî-‘āśû ’eṯ-hār^a‘ bə‘ênê yəhwâ:

13 wayye’ĕsōf ’ēlāyw ’eṯ-bənê ‘ammwōn w^a‘ămālēq wayyēleḵə wayyaḵə ’eṯ-yiśərā’ēl wayyîrəšû ’eṯ-‘îr hatəmārîm:

14 wayy^a‘aḇəḏû ḇənê-yiśərā’ēl ’eṯ-‘eḡəlwōn meleḵə-mwō’āḇ šəmwōneh ‘eśərēh šānâ: s

15 wayyizə‘ăqû ḇənê-yiśərā’ēl ’el-yəhwâ wayyāqem yəhwâ lâem mwōšî‘a ’eṯ-’ēhûḏ ben-gērā’ ben-hayəmînî ’îš ’iṭṭēr yaḏ-yəmînwō wayyišələḥû ḇənê-yiśərā’ēl bəyāḏwō minəḥâ lə‘eḡəlwōn meleḵə mwō’āḇ:

16 wayy^a‘aś lwō ’ēhûḏ ḥereḇ wəlāh šənê fêwōṯ gōmeḏ ’ārəkāh wayy^aḥəgōr ’wōṯāh mit^aḥaṯ ləmadāyw ‘al yereḵə yəmînwō:

17 wayyaqərēḇ ’eṯ-hamminəḥâ lə‘eḡəlwōn meleḵə mwō’āḇ wə‘eḡəlwōn ’îš bārî’ mə’ōḏ:

18 wayəhî ka’ăšer killâ ləhaqərîḇ ’eṯ-hamminəḥâ wayəšall^aḥ ’eṯ-hā‘ām nōśə’ê hamminəḥâ:

19 wəhû’ šāḇ min-hapəsîlîm ’ăšer ’eṯ-hagiləgāl wayyō’mer dəḇar-sēṯer lî ’ēleyḵā hammeleḵə wayyō’mer hās wayyēṣə’û mē‘ālāyw kāl-hā‘ōməḏîm ‘ālāyw:

20 wə’ēhûḏ| bā’ ’ēlāyw wəhû’-yōšēḇ b^a‘ălîyaṯ hamməqērâ ’ăšer-lwō ləḇadwō wayyō’mer ’ēhûḏ dəḇar-’ĕlōhîm lî ’ēleyḵā wayyāqām mē‘al hakissē’:

21 wayyišəl^aḥ ’ēhûḏ ’eṯ-yaḏ śəmō’lwō wayyiqq^aḥ ’eṯ-h^aḥereḇ mē‘al yereḵə yəmînwō wayyiṯəqā‘ehā bəḇiṭənwō:

22 wayyāḇō’ ḡam-hanniṣṣāḇ ’^aḥar hallahaḇ wayyisəgōr h^aḥēleḇ bə‘aḏ hallahaḇ kî lō’ šālaf h^aḥereḇ mibiṭənwō wayyēṣē’ haparəšəḏōnâ:

23 wayyēṣē’ ’ēhûḏ hammisədərwōnâ wayyisəgōr daləṯwōṯ hā‘alîyâ b^a‘ăḏwō wənā‘āl:

24 wəhû’ yāṣā’ w^a‘ăḇāḏāyw bā’û wayyirə’û wəhinnēh daləṯwōṯ hā‘ălîyâ nə‘ulwōṯ wayyō’mərû ’aḵə mēsîḵə hû’ ’eṯ-raḡəlāyw b^aḥăḏar hamməqērâ:

25 wayyāḥîlû ‘aḏ-bwōš wəhinnēh ’ênennû fōṯēḥa daləṯwōṯ hā‘ălîyâ wayyiqəḥû ’eṯ-hammafətēḥa wayyifətāḥû wəhinnēh ’ăḏōnêhem nōfēl ’arəṣâ mēṯ:

26 wə’ēhûḏ niməlaṭ ‘aḏ hiṯəmahəməhām wəhû’ ‘āḇar ’eṯ-hapəsîlîm wayyimmālēṭ haśśə‘îrāṯâ:

27 wayəhî bəḇwō’wō wayyiṯəq^a‘ baššwōfār bəhar ’efərāyim wayyērəḏû ‘immwō ḇənê-yiśərā’ēl min-hâār wəhû’ lifənêhem:

28 wayyō’mer³ ’ălēhem riḏəfû ’^aḥăray kî-nāṯan yəhwâ ’eṯ-’ōyəḇêḵem ’eṯ-mwō’āḇ bəyeḏəḵem wayyērəḏû ’^aḥărāyw wayyiləkəḏû ’eṯ-m^a‘əbərwōṯ hayyarədēn ləmwō’āḇ wəlō’-nāṯənû ’îš l^a‘ăḇōr:

29 wayyakû ’eṯ-mwō’āḇ bā‘ēṯ hahî’ k^a‘ăśereṯ ’ălāfîm ’îš kāl-šāmēn wəḵāl-’îš ḥāyil wəlō’ niməlaṭ ’îš:

30 watikān^a‘ mwō’āḇ bayywōm hahû’ t^aḥaṯ yaḏ yiśərā’ēl watišəqōṭ hā’āreṣ šəmwōnîm šānâ: s

31 wə’^aḥărāyw hāyâ šaməgar ben-‘ănāṯ wayyaḵə ’eṯ-pəlišətîm šēš-mē’wōṯ ’îš bəmaləmaḏ habāqār wayyōš^a‘ gam-hû’ ’eṯ-yiśərā’ēl: s