‎1 ‏וְיוֹסֵ֖ף הוּרַ֣ד מִצְרָ֑יְמָה וַיִּקְנֵ֡הוּ פּוֹטִיפַר֩ סְרִ֨יס פַּרְעֹ֜ה שַׂ֤ר הַטַּבָּחִים֙ אִ֣ישׁ מִצְרִ֔י מִיַּד֙ הַיִּשְׁמְעֵאלִ֔ים אֲשֶׁ֥ר הוֹרִדֻ֖הוּ שָֽׁמָּה׃

‎2 ‏וַיְהִ֤י יְהוָה֙ אֶת־יוֹסֵ֔ף וַיְהִ֖י אִ֣ישׁ מַצְלִ֑יחַ וַיְהִ֕י בְּבֵ֥ית אֲדֹנָ֖יו הַמִּצְרִֽי׃

‎3 ‏וַיַּ֣רְא אֲדֹנָ֔יו כִּ֥י יְהוָ֖ה אִתּ֑וֹ וְכֹל֙ אֲשֶׁר־ה֣וּא עֹשֶׂ֔ה יְהוָ֖ה מַצְלִ֥יחַ בְּיָדֽוֹ׃

‎4 ‏וַיִּמְצָ֨א יוֹסֵ֥ף חֵ֛ן בְּעֵינָ֖יו וַיְשָׁ֣רֶת אֹת֑וֹ וַיַּפְקִדֵ֙הוּ֙ עַל־בֵּית֔וֹ וְכָל־יֶשׁ־ל֖וֹ נָתַ֥ן בְּיָדֽוֹ׃

‎5 ‏וַיְהִ֡י מֵאָז֩ הִפְקִ֨יד אֹת֜וֹ בְּבֵית֗וֹ וְעַל֙ כָּל־אֲשֶׁ֣ר יֶשׁ־ל֔וֹ וַיְבָ֧רֶךְ יְהוָ֛ה אֶת־בֵּ֥ית הַמִּצְרִ֖י בִּגְלַ֣ל יוֹסֵ֑ף וַיְהִ֞י בִּרְכַּ֤ת יְהוָה֙ בְּכָל־אֲשֶׁ֣ר יֶשׁ־ל֔וֹ בַּבַּ֖יִת וּבַשָּׂדֶֽה׃

‎6 ‏וַיַּעֲזֹ֣ב כָּל־אֲשֶׁר־לוֹ֮ בְּיַד־יוֹסֵף֒ וְלֹא־יָדַ֤ע אִתּוֹ֙ מְא֔וּמָה כִּ֥י אִם־הַלֶּ֖חֶם אֲשֶׁר־ה֣וּא אוֹכֵ֑ל וַיְהִ֣י יוֹסֵ֔ף יְפֵה־תֹ֖אַר וִיפֵ֥ה מַרְאֶֽה׃

‎7 ‏וַיְהִ֗י אַחַר֙ הַדְּבָרִ֣ים הָאֵ֔לֶּה וַתִּשָּׂ֧א אֵֽשֶׁת־אֲדֹנָ֛יו אֶת־עֵינֶ֖יהָ אֶל־יוֹסֵ֑ף וַתֹּ֖אמֶר שִׁכְבָ֥ה עִמִּֽי׃

‎8 ‏וַיְמָאֵ֓ן׀ וַיֹּ֙אמֶר֙ אֶל־אֵ֣שֶׁת אֲדֹנָ֔יו הֵ֣ן אֲדֹנִ֔י לֹא־יָדַ֥ע אִתִּ֖י מַה־בַּבָּ֑יִת וְכֹ֥ל אֲשֶׁר־יֶשׁ־ל֖וֹ נָתַ֥ן בְּיָדִֽי׃

‎9 ‏אֵינֶ֨נּוּ גָד֜וֹל בַּבַּ֣יִת הַזֶּה֮ מִמֶּנִּי֒ וְלֹֽא־חָשַׂ֤ךְ מִמֶּ֙נִּי֙ מְא֔וּמָה כִּ֥י אִם־אוֹתָ֖ךְ בַּאֲשֶׁ֣ר אַתְּ־אִשְׁתּ֑וֹ וְאֵ֨יךְ אֶֽעֱשֶׂ֜ה הָרָעָ֤ה הַגְּדֹלָה֙ הַזֹּ֔את וְחָטָ֖אתִי לֵֽאלֹהִֽים׃

‎10 ‏וַיְהִ֕י כְּדַבְּרָ֥הּ אֶל־יוֹסֵ֖ף י֣וֹם׀ י֑וֹם וְלֹא־שָׁמַ֥ע אֵלֶ֛יהָ לִשְׁכַּ֥ב אֶצְלָ֖הּ לִהְי֥וֹת עִמָּֽהּ׃

‎11 ‏וַיְהִי֙ כְּהַיּ֣וֹם הַזֶּ֔ה וַיָּבֹ֥א הַבַּ֖יְתָה לַעֲשׂ֣וֹת מְלַאכְתּ֑וֹ וְאֵ֨ין אִ֜ישׁ מֵאַנְשֵׁ֥י הַבַּ֛יִת שָׁ֖ם בַּבָּֽיִת׃

‎12 ‏וַתִּתְפְּשֵׂ֧הוּ בְּבִגְד֛וֹ לֵאמֹ֖ר שִׁכְבָ֣ה עִמִּ֑י וַיַּעֲזֹ֤ב בִּגְדוֹ֙ בְּיָדָ֔הּ וַיָּ֖נָס וַיֵּצֵ֥א הַחֽוּצָה׃

‎13 ‏וַיְהִי֙ כִּרְאוֹתָ֔הּ כִּֽי־עָזַ֥ב בִּגְד֖וֹ בְּיָדָ֑הּ וַיָּ֖נָס הַחֽוּצָה׃

‎14 ‏וַתִּקְרָ֞א לְאַנְשֵׁ֣י בֵיתָ֗הּ וַתֹּ֤אמֶר לָהֶם֙ לֵאמֹ֔ר רְא֗וּ הֵ֥בִיא לָ֛נוּ אִ֥ישׁ עִבְרִ֖י לְצַ֣חֶק בָּ֑נוּ בָּ֤א אֵלַי֙ לִשְׁכַּ֣ב עִמִּ֔י וָאֶקְרָ֖א בְּק֥וֹל גָּדֽוֹל׃

‎15 ‏וַיְהִ֣י כְשָׁמְע֔וֹ כִּֽי־הֲרִימֹ֥תִי קוֹלִ֖י וָאֶקְרָ֑א וַיַּעֲזֹ֤ב בִּגְדוֹ֙ אֶצְלִ֔י וַיָּ֖נָס וַיֵּצֵ֥א הַחֽוּצָה׃

‎16 ‏וַתַּנַּ֥ח בִּגְד֖וֹ אֶצְלָ֑הּ עַד־בּ֥וֹא אֲדֹנָ֖יו אֶל־בֵּיתֽוֹ׃

‎17 ‏וַתְּדַבֵּ֣ר אֵלָ֔יו כַּדְּבָרִ֥ים הָאֵ֖לֶּה לֵאמֹ֑ר בָּֽא־אֵלַ֞י הָעֶ֧בֶד הָֽעִבְרִ֛י אֲשֶׁר־הֵבֵ֥אתָ לָּ֖נוּ לְצַ֥חֶק בִּֽי׃

‎18 ‏וַיְהִ֕י כַּהֲרִימִ֥י קוֹלִ֖י וָאֶקְרָ֑א וַיַּעֲזֹ֥ב בִּגְד֛וֹ אֶצְלִ֖י וַיָּ֥נָס הַחֽוּצָה׃

‎19 ‏וַיְהִי֩ כִשְׁמֹ֨עַ אֲדֹנָ֜יו אֶת־דִּבְרֵ֣י אִשְׁתּ֗וֹ אֲשֶׁ֨ר דִּבְּרָ֤ה אֵלָיו֙ לֵאמֹ֔ר כַּדְּבָרִ֣ים הָאֵ֔לֶּה עָ֥שָׂהּ¹ לִ֖י עַבְדֶּ֑ךָ וַיִּ֖חַר אַפּֽוֹ׃

‎20 ‏וַיִּקַּח֩ אֲדֹנֵ֨י יוֹסֵ֜ף אֹת֗וֹ וַֽיִּתְּנֵ֙הוּ֙ אֶל־בֵּ֣ית הַסֹּ֔הַר מְק֕וֹם אֲשֶׁר־אסורי אֲסִירֵ֥י הַמֶּ֖לֶךְ אֲסוּרִ֑ים וַֽיְהִי־שָׁ֖ם בְּבֵ֥ית הַסֹּֽהַר׃

‎21 ‏וַיְהִ֤י יְהוָה֙ אֶת־יוֹסֵ֔ף וַיֵּ֥ט אֵלָ֖יו חָ֑סֶד וַיִּתֵּ֣ן חִנּ֔וֹ בְּעֵינֵ֖י שַׂ֥ר בֵּית־הַסֹּֽהַר׃

‎22 ‏וַיִּתֵּ֞ן שַׂ֤ר בֵּית־הַסֹּ֙הַר֙ בְּיַד־יוֹסֵ֔ף אֵ֚ת כָּל־הָ֣אֲסִירִ֔ם אֲשֶׁ֖ר בְּבֵ֣ית הַסֹּ֑הַר וְאֵ֨ת כָּל־אֲשֶׁ֤ר עֹשִׂים֙ שָׁ֔ם ה֖וּא הָיָ֥ה עֹשֶֽׂה׃

‎23 ‏אֵ֣ין׀ שַׂ֣ר בֵּית־הַסֹּ֗הַר רֹאֶ֤ה אֶֽת־כָּל־מְא֙וּמָה֙ בְּיָד֔וֹ בַּאֲשֶׁ֥ר יְהוָ֖ה אִתּ֑וֹ וַֽאֲשֶׁר־ה֥וּא עֹשֶׂ֖ה יְהוָ֥ה מַצְלִֽיחַ׃ ס

1 wəywōsēf hûraḏ miṣərāyəmâ wayyiqənēhû pwōṭîfar sərîs parə‘ōh śar haṭṭabāḥîm ’îš miṣərî mîyaḏ hayyišəmə‘ē’lîm ’ăšer hwōriḏuhû šāmmâ:

2 wayəhî yəhwâ ’eṯ-ywōsēf wayəhî ’îš maṣəlîḥa wayəhî bəḇêṯ ’ăḏōnāyw hammiṣərî:

3 wayyarə’ ’ăḏōnāyw kî yəhwâ ’itwō wəḵōl ’ăšer-hû’ ‘ōśeh yəhwâ maṣəlîḥa bəyāḏwō:

4 wayyiməṣā’ ywōsēf ḥēn bə‘ênāyw wayəšāreṯ ’ōṯwō wayyafəqiḏēhû ‘al-bêṯwō wəḵāl-yeš-lwō nāṯan bəyāḏwō:

5 wayəhî mē’āz hifəqîḏ ’ōṯwō bəḇêṯwō wə‘al kāl-’ăšer yeš-lwō wayəḇāreḵə yəhwâ ’eṯ-bêṯ hammiṣərî biḡəlal ywōsēf wayəhî birəkaṯ yəhwâ bəḵāl-’ăšer yeš-lwō babayiṯ ûḇaśśāḏeh:

6 wayy^a‘ăzōḇ kāl-’ăšer-lwō bəyaḏ-ywōsēf wəlō’-yāḏ^a‘ ’itwō mə’ûmâ kî ’im-halleḥem ’ăšer-hû’ ’wōḵēl wayəhî ywōsēf yəfēh-ṯō’ar wîfēh marə’eh:

7 wayəhî ’^aḥar hadəḇārîm hā’ēlleh watiśśā’ ’ēšeṯ-’ăḏōnāyw ’eṯ-‘êneyhā ’el-ywōsēf watō’mer šiḵəḇâ ‘immî:

8 wayəmā’ēn| wayyō’mer ’el-’ēšeṯ ’ăḏōnāyw hēn ’ăḏōnî lō’-yāḏ^a‘ ’itî mah-babāyiṯ wəḵōl ’ăšer-yeš-lwō nāṯan bəyāḏî:

9 ’ênennû ḡāḏwōl babayiṯ hazzeh mimmennî wəlō’-ḥāśaḵə mimmennî mə’ûmâ kî ’im-’wōṯāḵə ba’ăšer ’atə-’išətwō wə’êḵə ’e‘ĕśeh hārā‘â hagəḏōlâ hazzō’ṯ wəḥāṭā’ṯî lē’lōhîm:

10 wayəhî kəḏabərāh ’el-ywōsēf ywōm| ywōm wəlō’-šām^a‘ ’ēleyhā lišəkaḇ ’eṣəlāh lihəywōṯ ‘immāh:

11 wayəhî kəhayywōm hazzeh wayyāḇō’ habayəṯâ l^a‘ăśwōṯ məla’ḵətwō wə’ên ’îš mē’anəšê habayiṯ šām babāyiṯ:

12 watiṯəpəśēhû bəḇiḡəḏwō lē’mōr šiḵəḇâ ‘immî wayy^a‘ăzōḇ biḡəḏwō bəyāḏāh wayyānās wayyēṣē’ h^aḥûṣâ:

13 wayəhî kirə’wōṯāh kî-‘āzaḇ biḡəḏwō bəyāḏāh wayyānās h^aḥûṣâ:

14 watiqərā’ lə’anəšê ḇêṯāh watō’mer lâem lē’mōr rə’û hēḇî’ lānû ’îš ‘iḇərî ləṣ^aḥeq bānû bā’ ’ēlay lišəkaḇ ‘immî wā’eqərā’ bəqwōl gāḏwōl:

15 wayəhî ḵəšāmə‘wō kî-hărîmōṯî qwōlî wā’eqərā’ wayy^a‘ăzōḇ biḡəḏwō ’eṣəlî wayyānās wayyēṣē’ h^aḥûṣâ:

16 watann^aḥ biḡəḏwō ’eṣəlāh ‘aḏ-bwō’ ’ăḏōnāyw ’el-bêṯwō:

17 watəḏabēr ’ēlāyw kadəḇārîm hā’ēlleh lē’mōr bā’-’ēlay hā‘eḇeḏ hā‘iḇərî ’ăšer-hēḇē’ṯā llānû ləṣ^aḥeq bî:

18 wayəhî kahărîmî qwōlî wā’eqərā’ wayy^a‘ăzōḇ biḡəḏwō ’eṣəlî wayyānās h^aḥûṣâ:

19 wayəhî ḵišəmō‘a ’ăḏōnāyw ’eṯ-diḇərê ’išətwō ’ăšer dibərâ ’ēlāyw lē’mōr kadəḇārîm hā’ēlleh ‘āśāh¹ lî ‘aḇədeḵā wayyiḥar ’apwō:

20 wayyiqq^aḥ ’ăḏōnê ywōsēf ’ōṯwō wayyitənēhû ’el-bêṯ hassōhar məqwōm ’ăšer-’ăsûrê ’ăsîrê hammeleḵə ’ăsûrîm wayəhî-šām bəḇêṯ hassōhar:

21 wayəhî yəhwâ ’eṯ-ywōsēf wayyēṭ ’ēlāyw ḥāseḏ wayyitēn ḥinnwō bə‘ênê śar bêṯ-hassōhar:

22 wayyitēn śar bêṯ-hassōhar bəyaḏ-ywōsēf ’ēṯ kāl-hā’ăsîrim ’ăšer bəḇêṯ hassōhar wə’ēṯ kāl-’ăšer ‘ōśîm šām hû’ hāyâ ‘ōśeh:

23 ’ên| śar bêṯ-hassōhar rō’eh ’eṯ-kāl-mə’ûmâ bəyāḏwō ba’ăšer yəhwâ ’itwō wa’ăšer-hû’ ‘ōśeh yəhwâ maṣəlîḥa: s